Ndërhyrjet e Bankës së Shqipërisë në tregun valutor janë intensifikuar ndjeshëm gjatë 3-mujorit të tretë të vitit 2025, në përpjekje për të frenuar zhvlerësimin e euros dhe për të zbutur presionet mbi kursin e këmbimit. Të dhënat zyrtare tregojnë se banka qendrore ka blerë gjithsej rreth 825.6 milionë euro deri në fund të 9-mujorit, përmes një kombinimi të ankandeve të njoftuara dhe blerjeve të drejtpërdrejta për qëllime të politikës monetare dhe stabilitetit financiar.
Një pjesë e këtyre ndërhyrjeve është realizuar përmes ankandeve të njoftuara në treg. Në tremujorin e tretë të vitit, Banka e Shqipërisë zhvilloi shtatë ankande, në të cilat u blenë 108.2 milionë euro, një nivel dukshëm më i lartë krahasuar me 88.9 milionë euro të blera në tremujorin e dytë dhe 33.2 milionë euro në tremujorin e parë. Në total, përmes këtij mekanizmi, blerjet e euros gjatë tre tremujorëve të parë të vitit arritën në 230.3 milionë euro, duke reflektuar një intensifikim progresiv të ndërhyrjeve në funksion të menaxhimit të presioneve të tregut.
Paralelisht me ankandet, Banka e Shqipërisë ka përdorur edhe instrumentin e blerjeve jashtë kalendarit të ankandeve, për realizimin e objektivave të politikës monetare dhe të stabilitetit financiar. Sipas të dhënave, pas blerjes së 72.7 milionë eurove në periudhën 7 maj – 30 qershor, gjatë tremujorit të tretë janë realizuar blerje të konsiderueshme sipas datës së marrëveshjes, duke e çuar totalin e blerjeve për vitin 2025 për këtë qëllim në 595.3 milionë euro. Këto ndërhyrje janë kryer në kushte të forcimit të lekut, të nxitur nga flukset e larta valutore në ekonomi, veçanërisht nga turizmi, remitancat dhe hyrjet kapitale.
Ndarja e qartë mes ankandeve të njoftuara dhe blerjeve jashtë radhe tregon se banka qendrore ka ndjekur një qasje të dyfishtë: nga njëra anë, ka përdorur ankandet si instrument transparent për të thithur gradualisht tepricën valutore; nga ana tjetër, ka ndërhyrë drejtpërdrejt kur presionet në treg janë vlerësuar si më të forta ose të shpejta, për të shmangur luhatje të theksuara të kursit të këmbimit.
Volumi i përgjithshëm prej mbi 825.6 milionë eurosh i blerë gjatë 9-mujorit të vitit 2025 konfirmon një rol aktiv të Bankës së Shqipërisë në administrimin e tregut valutor, pa devijuar nga parimi i kursit të lirë të këmbimit. Ndërhyrjet synojnë jo fiksimin e euros, por zbutjen e lëvizjeve të njëanshme dhe mbrojtjen e ekuilibrave makroekonomikë, në një periudhë ku presionet për zhvlerësimin e monedhës europiane mbeten të forta. /ekofin.al
