Vendimi i Këshillit të Ministrave, “Për miratimin e Programit të Reformave Ekonomike (ERP) 2025 – 2027”, botuar në Fletoren Zyrtare përcakton disa nga shpenzimet kryesore publike për vitin 2025.
Qeveria planifikon një total shpenzimesh publike për vitin 2025 në shumën 825.08 miliardë lekë ose 31.5% e PBB-së. Sipas programit, shpenzimet totale për pagat në administratën publike në nivel qendror planifikohen në masën 127.9 miliardë lekë ose 4.9% e PBB-së.
Në program parashikohet gjithashtu fondi për kompensimin e pronarëve në masën 3 miliardë lekë.
Shpenzime të tjera sociale, përfshin fondet për pagesën e papunësisë, aftësisë së kufizuar, ndihmës ekonomike, dëmshpërblimin e ish-të përndjekurve politikë dhe bonusin e lindjeve. Fondi për papunësinë është 800 milionë lekë ndërsa pagesa e ndihmës ekonomike dhe aftësisë së kufizuar parashikohen në nivelin 23.7 miliardë lekë.
Krahasuar me vitin 2024, totali i këtij zëri rezulton me ulje, pasi reflekton në tërësi një rialokim prej rreth 2.8 miliardë lekë te shpenzimet për fondin e sigurimeve shoqërore, në mënyrë që të gjithë përfituesit që gëzojnë statusin e invalidit të punës të mund të marrin pensionet e tyre, si dhe përfitimet e tjera që burojnë nga ky status nëpërmjet Institutit të Sigurimeve Shoqërore, pra një institucioni të vetëm, thuhet në dokument.
Sa u përket ish-të përndjekurit është parashikuar një fond prej 1.4 miliardë lekësh. Për bonusin e lindjeve është parashikuar një fond prej 2.25 miliardë lekësh.
Shpenzimet për subvencionet në 2025 janë parashikuar në masën 1.95 miliardë lekë dhe janë përqendruar në financimin e skemave të nxitjes së punësimit, mbështetjen e sektorit të ujësjellës kanalizimeve bazuar në performancën e tij, si dhe në mbulimin e një pjese të shpenzimeve të veprimtarisë hekurudhore dhe veprimtarisë së shërbimeve qeveritare./ekofin.al
