Pas arritjes së një rekordi të ri së fundmi nga kriptomonedha më e njohur në botë, pritet të rritet më tej në vlerë, duke arritur nivele përtej 160,000 dollarëve në 2025.
Çmimi i Bitcoin (BTC) pritet të arrijë një maksimum prej 162,353 dollarësh këtë vit (139,148 €), përpara se të stabilizohet rreth 145,167 dollarë (124,418 €).
Kjo është sipas sondazhit më të fundit të firmës fintech britanike Finder, që mbledh parashikime çmimesh nga 24 specialistë të industrisë së kriptove.
Brenda përgjigjeve, vlerësimet më të larta dhe më të ulëta variojnë gjerësisht, dhe parashikimet më optimiste presin një çmim kulmor prej 250,000 dollarësh këtë vit. Parashikimi mesatar më i ulët i çmimit është 87,618 dollarë, me disa që parashikojnë se Bitcoin do të bjerë deri në 70,000 dollarë.
Kriptomonedha së fundmi ka arritur në 120,000 dollarë nga pak më poshtë 100,000 në fund të vitit të kaluar.
“Ka një numër faktorësh që po rrisin kërkesën për Bitcoin, duke përfshirë rregullore më të qarta dhe më të favorshme, përdorim të shtuar si pagesa, dhe kushte ekonomike në ndryshim,” tha për Euronews CEO-ja i këmbimores së kriptove Zondacrypto, Przemysław Kral. Ai shtoi se rregulloret si MiCA e BE-së kanë kontribuar ndjeshëm në ngritjen e fundit. Rregullorja për Tregjet e Aseteve Kripto (MiCA) vendos rregulla të njëtrajtshme të tregut të BE-së për asetet kripto.
Kjo, e kombinuar me interesin e shtuar nga lojtarët institucionalë, kryesisht në formën e fondeve të tregtuara në bursë (ETFs), e ka bërë kripton më të aksesueshme për shumëkënd.
ETF-të e bazuara në kriptomonedha e bëjnë më të lehtë për investitorët që të marrin ekspozim ndaj kriptove pa pasur nevojë t’i blejnë ato drejtpërdrejt. Këto fonde janë bërë shumë të njohura që nga fillimi i tregtimit të ETF-ve të Bitcoin në tregjet amerikane vitin e kaluar.
A ka një flluskë rreth Bitcoin?
Ndërkohë që integrimi i kriptove në financën kryesore ka rritur ndjeshëm interesin për Bitcoin, ekziston mundësia që të jetë duke u formuar ajo që quhet një flluskë. Me fjalë të tjera, çmimi po ‘fryhet’ nga interesi i investitorëve pa u mbështetur në themele.
Sipas ekspertit të kriptove dhe profesorit të biznesit ndërkombëtar dhe strategjisë në Universitetin Northeastern, Ravi Sarathy, investitorët e mëdhenj institucionalë, përfshirë MicroStrategy, kanë akumuluar sasi të mëdha të këtij aktivi, dhe është e mundur që ata po e mbështesin çmimin e kriptomonedhës. MicroStrategy zotëron një rezervë Bitcoin-i me vlerë rreth 65 miliardë dollarë.
Pas qasjes hezituese të mëparshme nga investitorët institucionalë, “masat e reja amerikane që autorizojnë fondet ETF të Bitcoin e kanë bërë më të lehtë dhe më të përshtatshme për institucionet dhe investitorët individualë të investojnë disa nga burimet e tyre në këto mjete Bitcoin-i me rrezik të lartë/rikthim të lartë,” tha Sarathy për Euronews Business.
Emetimi i Bitcoin-it ka një tavan prej 21 milionë, duke nxitur kërkesën në rritje përballë një furnizimi të kufizuar. “Kjo ka çuar gjithashtu në ngritjen e Thesarëve të Aseteve Digjitale (një strategji korporative, shënim red.), të cilët kërkojnë fonde investitorësh për të investuar në një shumëllojshmëri kriptomonedhash dhe token-ash, përfshirë Bitcoin, një nxitje e mëtejshme për kërkesën, dhe që nxit një rritje të shpejtë të çmimit të Bitcoin-it,” tha Sarathy, duke shtuar se pas një reagimi të shkurtër ndaj legjislacionit të mëtejshëm amerikan, rritja afatgjatë e çmimit mund të vazhdojë.
Si po e nxit Uashingtoni ngritjen e Bitcoin-it
Interesi për Bitcoin është rritur ndjeshëm që kur Presidenti amerikan Donald Trump bëri fushatë gjerësisht për ta bërë SHBA-në kryeqytetin botëror të kriptove. Mbështetja e administratës amerikane për asetet kripto arriti nivele të reja kohët e fundit, pasi qeveria e quajti këtë javë ‘Java e Kriptos’. Ligjvënësit në Dhomën e Përfaqësuesve po diskutojnë një seri projektligjesh që mund të përcaktojnë kornizën rregullatore për industrinë në Shtetet e Bashkuara.
Specialistët më të etur të kriptove, që presin një rritje të madhe të çmimit, vënë bast që Bitcoin mund të arrijë 250,000 dollarë, i mbështetur nga kërkesa institucionale.
“Kërkesa korporative dhe institucionale nuk po ngadalësohet ndërkohë që tregu individual është ende i munguar dhe adoptimi nga shtetet sapo ka filluar,” tha Martin Froehler, CEO i platformës tregtare Morpher.
Çmimi i Bitcoin-it është rritur gati 25% që nga fillimi i vitit, pavarësisht pasigurive të vazhdueshme të lidhura me tensionet tarifore, konfliktin në Lindjen e Mesme, dhe mungesën e lehtësimit të politikës monetare në SHBA.
A është koha e duhur për të blerë Bitcoin?
Rreth 61% e ekspertëve të anketuar besojnë se është momenti i duhur për të blerë.
Megjithatë, kujdesi është gjithmonë i rëndësishëm, sipas CEO-së së Zondacrypto, Przemysław Kral.
Ai i tha Euronews: “Me gjithë këtë zhurmë vjen edhe nevoja për kujdes. Askush nuk e di nëse çmimi do të ngrihet apo do të bjerë. Ne gjithmonë rekomandojmë të bëni kërkimin tuaj dhe të merrni edukim mbi Bitcoin-in përpara se të investoni në të.”
Kadan Stadelmann, CTO në Komodo Platform, beson se Bitcoin do të rritet në mënyrë të qëndrueshme në vlerë gjatë gjashtë muajve të ardhshëm përpara se të hyjë në një treg rënës (kur investitorët kryesisht shesin në vend që të blejnë).
“Duke marrë parasysh që Bitcoin-i tashmë ka prekur 110,000 dollarë, dhe ka ende të paktën gjashtë muaj të mbetur në këtë bull run… pres kulmin rreth tremujorit të parë të 2026 dhe një treg rënës që do ta pasojë,” tha Stadelmann.
Kur u pyetën për pritshmëritë e tyre afatgjata, ekspertët e kriptove të anketuar nga Finder thanë se Bitcoin mund të arrijë vlera prej 458,647 dollarësh deri në 2030 dhe të kapërcejë 1 milion dollarë deri në 2035.
Si mund të ndikojë kompjuterizimi kuantik në sigurinë kriptografike të Bitcoin-it
Shumica dërrmuese e specialistëve të kriptove të anketuar (79%) e shohin kompjuterizimin kuantik si një kërcënim për sigurinë kriptografike të Bitcoin-it, pasi kompjuterët kuantikë mund të thyejnë standardet e enkriptimit që sigurojnë kriptomonedhat.
Një e katërta e ekspertëve (25%) mendojnë se kompjuterët kuantikë do të jenë në gjendje të thyejnë Bitcoin-in brenda pesë viteve të ardhshme, dhe një tjetër 25% e konsiderojnë këtë si një mundësi realiste brenda pesë deri në dhjetë vitet e ardhshme. Pjesa tjetër (29%) thonë se do të duhet më shumë se dhjetë vjet.
Vetëm 8% thonë se kompjuterët kuantikë nuk paraqesin kërcënim, dhe vetëm një e treta e ekspertëve janë të bindur se komuniteti i Bitcoin-it është disi i përgatitur për këtë kërcënim./Përshtati nga Euronews, ekofin.al
