Fitimi i sektorit bankar në Shqipëri mbeti pothuajse në të njëjtat nivele gjatë tremujorit të parë të vitit 2026, krahasuar me të njëjtën periudhë të një viti më parë, ndërsa bankat vijuan zgjerimin e kreditimit, rritjen e aktiveve dhe forcimin e kapitalit. Të dhënat zyrtare të Shoqatës Shqiptare të Bankave tregojnë se fitimi neto i sistemit bankar arriti në 8.42 miliardë lekë në fund të marsit 2026, nga 8.35 miliardë lekë në të njëjtën periudhë të vitit 2025, me një rritje prej rreth 0.9%.
Ndërkohë sektori shënoi rritje të moderuar në kreditim, depozita dhe investime në tituj, krahasuar me fundin e vitit 2025, ndërsa kapitali mbeti pothuajse i pandryshuar. Sipas të dhënave të Shoqatës Shqiptare të Bankave, aktivet totale të sistemit arritën në 2.297 trilionë lekë në fund të marsit 2026, nga 2.295 trilionë lekë në fund të dhjetorit 2025.
Portofoli i kredive neto u rrit me rreth 20.3 miliardë lekë në vetëm tre muaj, duke kaluar nga 925.9 miliardë lekë në fund të vitit 2025 në 946.3 miliardë lekë në fund të marsit 2026. Kjo përkthehet në një rritje prej rreth 2.2% në baza tremujore.
Edhe depozitat vijuan rritjen gjatë tremujorit të parë. Totali i depozitave arriti në 1.909 trilionë lekë, nga 1.885 trilionë lekë në fund të 2025, ose rreth 1.3% më shumë.
Investimet në tituj kanë vijuar të zënë peshën më të madhe në strukturën e aktiveve bankare, duke u rritur nga 909.6 miliardë lekë në fund të 2025 në 940.8 miliardë lekë në fund të marsit 2026. Rritja tremujore rezulton rreth 3.4%, dukshëm më e lartë se zgjerimi i kreditimit.
Përgjithësisht sektori shfaqi norma të qëndrueshme fitimesh për pjesën më të madhe të bankave, performancë të mirë në 3-mujorin e parë dhe tregues në përmirësim të kapitalizimit. /ekofin.al
