Rritja e aktivitetit të sigurimit, është reflektuar edhe në rritje të fitimeve për shoqëritë e sigurimit. Referuar të dhënave të publikuara nga AMF, në fund të 6-mujorit të parë, fitimi neto i tregut të sigurimeve në total arriti në 1.28 miliardë lekë, në rritje, krahasuar me 6-mujorin e parë të vitit të kaluar.
Kjo rritje është udhëhequr kryesisht nga tregu i sigurimeve të Jo-Jetës, që ka edhe pjesën më të madhe në tregun e sigurimeve. Fitimet e këtij tregu për 6 muaj e parë të vitit arritën në 1.13 miliardë lekë, kundrejt 996 milionë lekë të 6-mujorit të parë të vitit të kaluar. E kundërta ka ndodhur me tregun e sigurimeve të Jetës, fitimet e të cilit kanë shënuar rënie krahasuar me të njëjtën periudhë të një viti më parë. Kështu, 4 kompanitë që operojnë në tregun e Jetës ka gjeneruar rreth 150 milionë lekë fitime në 6 mujorin e parë të këtij viti, përkundrejt 190 milionë lekë të vitit 2023.
Edhe pse fitimet vijojnë të jenë me rritje, disa nga treguesit paraqiten në rënie. Kështu, raporti i normës së fitimit nga kapitali ka zbritur në 6.94%, nga 8.14% që ishte në të njëjtën periudhë të vitit 2023. Me rënie është edhe raporti i normës së fitimit të aseteve, në 2.36%, nga 2.61%.
Edhe norma e fitimit nga rezultati teknik, që lidhet direkt me aktivitetin sigurues, ka pësuar rënie, nga rreth 16% në vitin 2023, në 14%. Kjo edhe për shkak se primet nuk janë rritur me të njëjtin ritëm me atë të pagesës së dëmeve. Primet e fituara neto janë rritur me 7% krahasuar me një vit më pare, ndërsa shpenzimet për dëmet neto janë rritur me 16%. /ekofin.al
