Gjashtë vende të Bashkimit Evropian po bëjnë presion për vendosjen e një takse në të gjithë bllokun mbi fitimet e jashtëzakonshme të kompanive të naftës, të cilat janë rritur ndjeshëm për shkak të luftës në Lindjen e Mesme dhe pasojave të saj në tregjet energjetike.
Ministrat e Financave të Gjermanisë, Italisë, Austrisë, Polonisë dhe Portugalisë, së bashku me ministrin spanjoll të Financave, i kanë dërguar një letër të përbashkët ministrit irlandez të Financave. Irlanda mban aktualisht presidencën e radhës të Këshillit të BE-së.
Në letër, ministrat kërkojnë që diskutimi për vendosjen e një takse mbi fitimet e jashtëzakonshme të kompanive të naftës të përfshihet në rendin e ditës së takimit të ardhshëm të ministrave të Financave të BE-së, që do të zhvillohet në Dublin muajin e ardhshëm.
Sipas ministrave, kompanitë e naftës po përfitojnë nga rritja e ndjeshme e marzheve të fitimit dhe e të ardhurave në një kohë kur çmimet e naftës dhe kostot e energjisë janë rritur, duke rënduar edhe më tej koston e jetesës për qytetarët.
Ata propozojnë diskutimin e një kuadri të përbashkët evropian për taksimin e fitimeve të jashtëzakonshme, duke marrë në konsideratë edhe përvojën e vitit 2022, kur BE-ja ndërmori masa të ngjashme pas pushtimit rus të Ukrainës.
Nisma thuhet se është nxitur nga ministri gjerman i Financave, Lars Klingbeil, i cili ka argumentuar se kompanitë energjetike nuk duhet të përfitojnë në mënyrë të tepruar në kurriz të konsumatorëve gjatë krizës.
Sipas një burimi të ministrisë gjermane, “fitimet e tepërta nga kriza duhet t’u kthehen konsumatorëve”.
Të ardhurat e kompanive energjetike janë rritur ndjeshëm që prej nisjes së luftës SHBA-Izrael kundër Iranit në shkurt, ndërsa kufizimet e trafikut detar përmes ngushticës strategjike të Hormuzit kanë ndikuar në furnizimet globale të energjisë.
