Në prag të festave të fundvitit, në tregjet e fruta-perimeve, çmimet për prodhimet e vendit nuk kanë ndryshuar.
Nga një vëzhgim në tregjet e kryeqytetit, rezulton se prodhimi i bollshëm ka frenuar rritjen e çmimeve, që zakonisht shoqëron fruta-perimet gjatë fundit të muajit dhjetor.
Prodhimi vendas dominon tregun ndonëse nuk mungon dhe ai i importit që nuk konkurron për nivel çmimi atë të vendit.
Në tregun e zonës së “Ali Demit” në Tiranë, çmimet nuk kanë ndryshuar për një pjesë të madhe të zarzavateve që janë prodhim vendi. Kështu mandarinat tregtohen me 80-90 lekë/kg, mollët variojnë nga 50 deri 60 lekë/kg, lakra 70 lekë/kg, portokallet 80- 100 lekë/kg, qepët shiten 60 lekë/kg, domatet 90 lekë/kg, patatet 50 lekë/kg.
Mbi bazën e statistikave që disponon, Ministria e Bujqësisë dhe Zhvillimit Rural bën të ditur se çmimet e prodhimeve bujqësore nuk kanë luhatje edhe në tregjet e tjera të vendit, madje në zonat me prodhim të lartë bujqësor (Lushnjë, Fier, Berat) çmimet mbajnë edhe nivelin më të ulët në shitje.
Sipas MBZHR, prodhimi vendas bujqësor mbizotëron ndaj produkteve të importit në tregjet e vendit, duke favorizuar dhe qëndrueshmëri të çmimeve, krahas rritjes së eksporteve “Made in Albania”.
