Ndërsa Qeveria ka çelur emetimin e Eurobondit, për të marrë një borxh të ri me vlerë 700 milionë euro, Banka e Shqipërisë i ka paraprirë daljes në tregjet ndërkombëtare, duke krijuar kushte favorizuese për bankat tregtare në vend për të blerë borxhin e Qeverisë në monedhë të huaj.
Gjithashtu, Banka e Shqipërisë kërkon të lehtësojë bankat tregtare në procedurën e dhënies së kredisë, përsëri në monedhë të huaj, ndaj operatorit të energjisë OSHEE, duke përdorur në këtë rast garancinë sovrane të miratuar nga Qeveria disa javë më parë.
Në një vendim qarkullues, pra të marrë jashtë rradhe, nga Këshilli Mbikëqyrës i Bankës së Shqipërisë, realizohen ndryshimet përkatëse në Rregulloren e Mjaftueshmërisë së kapitalit. Këto ndryshime janë publikuar në Fletoren Zyrtare, duke hyrë në fuqi. EkoFin publikon më poshtë vendimin e plotë të Bankës së Shqipërisë:
VENDIM QARKULLUES Nr. 54, datë 9.11.2021
PËR DISA NDRYSHIME NË RREGULLOREN “PËR RAPORTIN E MJAFTUESHMËRISË SË KAPITALIT”
Në bazë dhe për zbatim të nenit 12, shkronja “a”, dhe nenit 43, shkronja “c”,të ligjit nr. 8269, datë 23.12.1997,“Për Bankën e Shqipërisë”, i ndryshuar; të nenit 58, shkronjat “a”, “b”, “c” dhe të nenit 60, pika 2,të ligjit nr.9662, datë 18.12.2006,“Për bankat në Republikën e Shqipërisë”, i ndryshuar; me propozim të Departamentit të Mbikëqyrjes, Këshilli Mbikëqyrës i Bankës së Shqipërisë
VENDOSI:
1. Në rregulloren “Për raportin e mjaftueshmërisë së kapitalit”, miratuar me vendimin e Këshillit Mbikëqyrës nr. 48, datë 31.7.2013, e ndryshuar, të bëhet ndryshimi i mëposhtëm:
a) Në nenin 198/1, paragrafi ekzistues bëhet pika 1, si dhe shtohen pikat 2, 3 dhe 4 me përmbajtjen e mëposhtme:
“2. Përjashtimisht nga përcaktimi i nenit 12, pika 2,të kësaj rregulloreje, bankat ponderojnë me 0% titujt e borxhit të qeverisë shqiptare në monedhë të huaj, të emetuar gjatë vitit 2021.
3. Përjashtimisht nga përcaktimi i nenit 14, pika 1,të kësaj rregulloreje, bankat ponderojnë me 0% ekspozimetnë formën e kredisë në monedhë të huaj të akorduar gjatë vitit 2021 ndaj Operatorit të Shpërndarjes së Energjisë Elektrike sh.a., të garantuar plotësisht nga qeveria shqiptare.
4. Dispozitat e parashikuara në paragrafët 2 dhe 3,të këtij neni, do të zbatohen deri në maturimin e këtyre ekspozimeve.”
2. Ngarkohen bankat e licencuara nga Banka e Shqipërisë me zbatimin e këtij vendimi.
3. Ngarkohen Departamenti i Mbikëqyrjes dhe Departamenti i Statistikave Financiare për ndjekjen e zbatimit të këtij vendimi.
4. Ngarkohen Kabineti i Guvernatorit dhe Departamenti i Kërkimeve me publikimin e këtij vendimi, përkatësisht në Fletoren Zyrtare të Republikës së Shqipërisë dhe në Buletinin Zyrtar të Bankës së Shqipërisë.
Ky vendim hyn në fuqi menjëherë.
