Një numër rekord europianësh mendojnë se vendi i tyre ka përfituar nga anëtarësimi në BE. Një sondazh i ri i publikuar nga Eurobarometri, tregon se në total 74% e europianëve, nga të gjitha vendet anëtare të bllokut, besojnë se vendi i tyre ka përfituar nga anëtarësimi në BE.
Kjo është shifra më e lartë e mbështetjes që kur europianëve iu drejtohet kjo pyetje përmes sondazheve në 1983. Bie në sy se edhe në Hungarinë euroskeptike të Orbán mbështetja është e konsiderueshme, pasi 74% e shohin gotën gjysmë plot, madje edhe përpara Italisë (67%) dhe Francës (65%).
Sondazhi tregon se europianët kanë pritshmëri të mëdha nga BE-ja në rolin e saj për t’i mbrojtur nga sfidat globale dhe rreziqet e sigurisë.
Imazhi i Bashkimit Evropian është pozitiv për më shumë njerëz (50%). Kjo është një rritje prej dy pikësh në krahasim me pranverën e 2024 dhe pesë pikë më shumë se në vjeshtën e 2023. 66% duan që roli i BE-së në mbrojtjen e qytetarëve nga krizat globale dhe rreziqet e sigurisë të bëhet më i rëndësishëm, ndërsa 50% pranojnë se ky rol mbrojtës është rritur tashmë vitet e fundit.
Mbrojtja dhe siguria është fusha kryesore në të cilën BE-ja duhet të fokusohet për të forcuar pozitën e saj në botë, sipas 36% të europianëve. 33% presin që standardi i tyre i jetesës të ulet gjatë pesë viteve të ardhshme. 43% i kërkojnë Parlamentit Evropian që t’i japë përparësi trajtimit të inflacionit, rritjes së çmimeve dhe kostos së jetesës. Mbrojtja dhe siguria e BE-së dhe lufta kundër varfërisë dhe përjashtimit social janë të radhës në listë (të dyja me 31%).
