Rënia e monedhës së përbashkët në tregun e brendshëm nuk ka të ndalur, ndërsa sapo ka hyrë muaji korrik. Pritshmëritë, marrë në konsideratë trendin e viteve të fundit, janë për rënie të mëtejshme gjatë javëve në vijim.
Sipas kursit zyrtar të Bankës së Shqipërisë një euro u këmbye sot me 118.93 lekë, duke zbritur për herë të parë nën 119 lekë, që nga koha kur euro hyri si monedhë fizike në Europë, më shumë sesa 20 vjet më parë.
Në krahasim me fillimin e këtij viti, euro po këmbehet me gati 2 lekë më pak. Euro u rrit për pak kohë në fillim të marsit, duke arritur deri në 127 lekë, si rrjedhojë e pasigurive që u shkaktuan në furnizime nga kriza e shkaktuar nga sulmet e Rusisë ndaj Ukrainës. Më pas, kursi iu rikthye ekuilibrave.
Nga fillimi i qershorit deri tani, euro ka humbur pikë vazhdimisht në tregun vendas. Aktorët e tregut të këmbimeve thanë se kjo dukuri lidhet me dy faktorë. I pari ka të bëjë me efektin ciklik sezonal të turizmit. Hyrja e shtetasve të huaj, në rritje sipas INSTAT për 5 mujorin, ka sjellë edhe prurje të valutës evropiane.
Faktori tjetër ka të bëjë me paratë informale në qarkullim, që gjithmonë kanë ndikuar në shtimin e ofertës në vend. Duket se flukset hyrëse mund të jenë shtuar edhe më tej, pas daljes për konsultim të ligjit për amnistinë.
