Enti Rregullator i Energjisë (ERE) ka vendosur për herë të dytë të rrëzojë kërkesat e përfaqësuesve të taksive elektrike, duke lënë në fuqi vendimin për çmimin e energjisë për karikimin e automjeteve elektrike në pikat me fuqi të instaluar mbi 11 kW.
Me Vendimin nr. 295, datë 17.11.2025, Bordi i ERE-s rrëzoi kërkesat e Shoqatës “Taksitë e Klasit të Parë” dhe Sindikata Shqiptare e Taksive për rishikimin e Vendimit nr. 255, datë 15.10.2025, i cili përcakton çmimin 22 lekë/kWh dhe aplikimin e një tarife të diferencuar në orarin e pikut, në fuqi prej 1 nëntorit 2025.
Çfarë kërkonin taksitë?
Dy shoqatat kishin kërkuar pezullimin e menjëhershëm të tarifës së re dhe zhvillimin e një dëgjimi publik; vendosjen e një çmimi preferencial për karikimin e taksive elektrike, duke i argumentuar ato si shërbim publik me ndikim social e mjedisor; krijimin e skemave të subvencionimit apo lehtësive fiskale për të shmangur barrën ekonomike mbi operatorët; si dhe masa shtesë si heqja e TVSH-së për energjinë dhe shërbimin, rimbursime dhe skema kompensimi.
Pse u rrëzuan kërkesat
ERE arsyeton se kërkesat nuk shoqëroheshin me prova të reja që të justifikonin rishikimin e vendimit, siç kërkohet nga ligji. Sipas institucionit afati ligjor për paraqitjen e provave është 7 ditë nga marrja dijeni e vendimit dhe kërkesat për rishikim nuk e pezullojnë zbatimin, përveç nëse Bordi vendos ndryshe;
Një shkresë shtesë e depozituar më 31.10.2025 nga Shoqata u konsiderua jashtë afatit dhe, edhe po të ishte në kohë, nuk përbënte “provë të re”, pasi sillte vetëm argumente ekonomike, jo fakte apo dokumente të reja;
Vendimi është marrë në përputhje me parimet e ligjit për energjinë, përfshirë mbulimin e kostove dhe shmangien e ndërsubvencionimit ndërmjet kategorive të konsumatorëve;
Çmimi 22 lekë/kWh reflekton kostot e shërbimit dhe disbalancat që pikat me fuqi mbi 11 kW shkaktojnë në sistem, me synim garantimin e qëndrueshmërisë së sistemit dhe furnizimit universal.
Vendimi i dytë refuzues
Kjo nuk është hera e parë që ERE refuzon kërkesat. Më herët, me Vendimin nr. 271, datë 31.10.2025, institucioni kishte rrëzuar kërkesat për pezullim të tarifës. Vendimi i 17 nëntorit e mbyll kështu edhe procedurën e rishikimit, duke e konsideruar atë një mjet të jashtëzakonshëm administrativ që lejohet vetëm kur ka rrethana të reja thelbësore, të cilat në këtë rast u vlerësuan se mungojnë.
Vendimi ka hyrë në fuqi menjëherë dhe është botuar në Fletoren Zyrtare. Shoqatat kanë të drejtë të ankimojnë në Gjykatën Administrative të Tiranës brenda 30 ditëve nga publikimi./ekofin.al
