Shqipëria vijon të përballet me një rënie të popullsisë. Sipas të dhënave më të fundit të publikuara nga INSTAT, më 1 janar 2025, popullsia banuese e vendit ishte 2.363.314 banorë, duke shënuar një tkurje prej 1,2% krahasuar me të njëjtën datë të një viti më parë.
Edhe pse shtesa natyrore në vitin 2024 ishte pozitive me +1.208 lindje më shumë se vdekje, bilanci i popullsisë mbeti negativ për shkak të migracionit neto, i cili regjistroi një dalje neto prej -28.836 personash.
Një tjetër tregues alarmant gjithashtu është plakja e popullsisë. Mosha mediane është rritur nga 43,5 vjeç në 2024 në 44,3 vjeç në fillim të 2025, duke reflektuar uljen e lindshmërisë dhe emigrimin e të rinjve. Kjo e ka çuar edhe raportin e varësisë së të moshuarve në 33,3%, në rritje nga 31,1% një vit më parë.
Nga pikëpamja territoriale, Tirana është i vetmi qark me rritje të popullsisë, me +0,2%. Në të kundërt, Shkodra (-2,5%) dhe Kukësi (-2,3%) regjistrojnë rëniet më të mëdha. Megjithatë, Tirana përqendron 32,2% të popullsisë së vendit, ndjekur nga Fieri (9,9%) dhe Elbasani (9,6%).
Për vitin 2024, numri i lindjeve tejkaloi vdekjet, por jo në masë të mjaftueshme për të kompensuar humbjet nga migracioni. Ndërkohë, raporti gjinor në lindje (numri i meshkujve për 100 femra) u rrit lehtë nga 106,8 në 107,8, duke ruajtur tendencën historike të lindjes së më shumë meshkuj.
Shqetësim mbetet edhe raporti i varësisë së përgjithshme, që tregon barrën që mbart popullsia në moshë pune për të mbështetur të rinjtë dhe të moshuarit, i cili është rritur nga 55,0% në 57,1%. /ekofin.al
