Eksporti i tekstileve dhe këpucëve, që përbën një zë të rëndësishëm të tregtisë së jashtme të Shqipërisë, ka shfaqur shenja rikuperimi gjatë 10-mujorit të parë të këtij viti, krahasuar me të njëjtën periudhë të vitit 2020.
Por sërish eksportet ishin më të ulëta, krahasuar me 10-mujorin e 2019, që përkon me periudhën para pandemisë. Eksportuesit që operojnë në këtë industri thonë se sektori ende po përballet me mungesën e porosive të reja, si rrjedhojë e krijimit të stoqeve gjatë karantinës.
Referuar të dhënave të publikuara nga Instituti i Statistikave, eksportet e këtij grupi arritën 91.7 miliardë lekë gjatë periudhës janar-tetor të këtij viti, kur në 10-mujorin e 2019-ës ato llogariteshin mbi 118.2 miliardë lekë. Ndërsa gjatë 10-mujorit të vitit 2020 eksportet e tekstileve dhe këpucëve ishin 85 miliardë lekë.
Industria fason ka një peshë specifike në eksportet shqiptare dhe në punësim. Kjo industri kontribuon me 38 % në totalit të eksporteve dhe angazhon 45 % të forcës punëtore.
Falë avantazheve të tilla si pozicioni gjeografik i vendit, kuadri ligjor me standardet e BE-së, kosto e ulët e transportit dhe infrastrukturës, fuqisë punëtore, e gatshme për të punuar në këtë sektor, por edhe investimeve të larta të kompanive në makineri dhe pajisje, vitet e fundit kemi zgjerim të eksporteve drejt tregjeve të reja dhe disa kompani po shkojnë drejt mbylljes së plotë të ciklit.
