Eksporti i tekstileve dhe këpucëve, që përbën një zë të rëndësishëm të tregtisë së jashtme të Shqipërisë vijoi rikuperimin edhe gjatë pesëmujorit të parë të këtij viti duke zënë 27 % të vëllimit të eksporteve.
Eksportet e këtij grupi rezultuan më të larta edhe krahasuar me pesëmujorin e parë 2019-ës, që përkon me periudhën para pandemisë.
Referuar të dhënave të publikuara nga Instituti i Statistikave, eksportet e këtij grupi arritën 56.3 miliardë lekë gjatë periudhës janar-maj të këtij viti, kur në pesëmujorin e 2021-shit ato llogariteshin rreth 45.6 miliardë lekë. Në pesëmujorin e parë të 2019-ës ato ishin 51.6 miliardë lekë.
Industria fason ka një peshë specifike në eksportet shqiptare dhe në punësim. Kjo industri kontribuon me 38 % në totalit të eksporteve dhe angazhon 45 % të forcës punëtore.
Falë avantazheve të tilla si pozicioni gjeografik i vendit, kuadri ligjor me standardet e BE-së, kosto e ulët e transportit dhe infrastrukturës, fuqisë punëtore, e gatshme për të punuar në këtë sektor, por edhe investimeve të larta të kompanive në makineri dhe pajisje, vitet e fundit kemi zgjerim të eksporteve drejt tregjeve të reja dhe disa kompani po shkojnë drejt mbyllje së plotë të ciklit.
