Shqipëria ka regjistruar një kthesë pozitive në tregtinë e jashtme gjatë muajit prill 2026, teksa eksportet kanë shënuar rritjen më të fortë të muajve të fundit. Të dhënat e publikuara nga INSTAT tregojnë se eksportet e mallrave arritën në 34.9 miliardë lekë, me një rritje prej 16.9% krahasuar me të njëjtin muaj të vitit të kaluar.
Megjithatë, pavarësisht këtij përmirësimi, ekonomia shqiptare vijon të mbetet e varur nga importet. Gjatë prillit, importet arritën në 79 miliardë lekë, ndërsa deficiti tregtar mbeti i lartë, në 44.1 miliardë lekë.
Shifrat tregojnë një ekonomi që po përpiqet të rikuperojë ritmin e eksporteve pas një periudhe të gjatë tkurrjeje, por që ende nuk ka arritur të balancojë raportin mes prodhimit vendas dhe konsumit të mbështetur te mallrat e importuara.
Rritja e eksporteve është udhëhequr kryesisht nga sektori i mineraleve, lëndëve djegëse dhe energjisë elektrike, i cili ka kontribuar me 9.8 pikë përqindje në totalin e rritjes. Një tjetër shtysë e fortë ka ardhur nga materialet e ndërtimit dhe metalet me 6.6 pikë përqindje.
Kjo tregon se eksportet shqiptare vazhdojnë të mbështeten kryesisht në sektorë bazikë dhe në produkte me vlerë të ulët të shtuar, të lidhura me lëndët e para, energjinë dhe industrinë përpunuese të metaleve.
Nga ana tjetër, sektori fason, që për vite me radhë ka qenë një nga motorët kryesorë të eksporteve shqiptare, vijon të japë sinjale dobësimi. Tekstilet dhe këpucët kanë ndikuar negativisht në ecurinë e eksporteve me -1.8 pikë përqindje.
Kjo rënie lidhet jo vetëm me ngadalësimin e kërkesës në tregjet europiane, por edhe me kostot më të larta të prodhimit, mungesën e fuqisë punëtore dhe konkurrencën në rritje nga tregjet aziatike.
Edhe pse eksportet u rritën ndjeshëm, importet vazhdojnë të dominojnë ekonominë shqiptare. Në prill, Shqipëria importoi më shumë se dyfishin e mallrave që eksportoi.
Rritja e importeve është nxitur kryesisht nga ushqimet, pijet dhe duhani, si edhe nga mineralet dhe energjia.
Megjithatë, një sinjal pozitiv është ulja e deficitit tregtar me 3.8% krahasuar me prillin e vitit të kaluar. Kjo tregon se ritmi i eksporteve ka qenë më i shpejtë se ai i importeve gjatë kësaj periudhe.
Europa mbetet partneri kryesor
Sipas të dhënave të INSTAT, vendet e Bashkimit Europian vijojnë të dominojnë tregtinë shqiptare, duke zënë 53.8% të totalit të shkëmbimeve tregtare. Eksportet drejt BE-së përbëjnë 62% të eksporteve totale të vendit.
Kosova dhe Gjermania rezultojnë ndër tregjet me rritjen më të fortë të eksporteve shqiptare gjatë prillit, ndërsa Italia mbetet partneri kryesor tregtar, pavarësisht një rënieje të eksporteve drejt këtij shteti me 3.8%.
Nga ana tjetër, importet nga Kina janë rritur me gati 19%, një tregues që konfirmon rritjen e pranisë së mallrave kineze në tregun shqiptar. /ekofin.al
