Gjatë vitit 2024 kanë ushtruar efektivisht funksionin e gjyqtarit në gjykatat e të gjitha niveleve, gjithsej 272 gjyqtarë në të njëjtën periudhë kohore.
Të dhënat nga raporti vjetor i vitit 2024 të Këshillit të Lartë Gjyqësor tregojnë se sistemi gjyqësor gjatë vitit që lamë pas ka funksionuar me pothuajse 66.6% të kapacitetit të tij, ose me 6.6% më shumë së në vitin 2023.
Kontribues kryesor në rritjen e numrit të gjyqtarëve efektivisht në detyrë kanë qenë kryesisht emërimet e magjistratëve të rinj. Kjo pasi gjatë vitit 2024, janë emëruar 32 magjistratë të cilët kanë përfunduar programin e formimit fillestar pranë Shkollës së Magjistraturës në vitin akademik 2023-2024.
Referuar të dhënave statistikore, numri i magjistratëve të emëruar në sistem nga viti 2019 në vitin 2024 është 144 magjistratë, nga të cilët 4 gjyqtarë në Gjykatën e Lartë nga radhët e juristëve të spikatur dhe 140 magjistratë të diplomuar nga Shkolla e Magjistraturës.
Në lidhje me humbjet nga sistemi si pasojë e procesit të rivlerësimit kalimtar raporti thekson se që nga fillimi i procesit rezultojnë 113 vendimmarrje shkarkim nga detyra me vendim të formës së prerë nga ana e KPA-së, nga të cilat 24 vendimmarrje i përkasin vitit 2024.
Rezulton, gjithashtu, se që nga fillimi i procesit të rivlerësimit kalimtar me vendim të KPK-së janë shkarkuar nga detyra në total 144 gjyqtarë, me një efekt financiar në shumën mbi 965 milionë lekë deri në 31 dhjetor 2024.
Vetëm për vitin 2024 janë shkarkuar 7 gjyqtarë me vendimmarrje të KPK–së, të cilët presin zhvillimin e procesit në KPA, duke mbajtur ndërkohë statusin e gjyqtarit për shkak të pezullimit, si dhe duke përfituar njëkohësisht 75% të pagës bruto fillestare, sipas ligjit. Efekti financiar i përllogaritur në buxhet është në shumën rreth 12 milionë lekë.
Përgjatë vitit 2024 në total rezultojnë 60 gjyqtarë me vendimmarrje nga KPK-ja për shkarkim nga detyra, të cilët presin zhvillimin e procesit në KPA, duke mbajtur ndërkohë statusin e gjyqtarit për shkak të pezullimit, si dhe duke përfituar njëkohësisht 75% të pagës bruto fillestare, sipas ligjit. Një situatë e tillë përllogaritet me një efekt financiar në shumën rreth 141 milionë lekë.
Ndërkohë që deri më 31 dhjetor 2024, rezultojnë 33 gjyqtarë të shkarkuar nga detyra, me vendimmarrje të KPK-së, të cilët do të presin zhvillimin e procesit në KPA përgjatë vitit 2025, duke mbajtur ndërkohë statusin e gjyqtarit për shkak të pezullimit, por duke përfituar njëkohësisht sipas ligjit 75% të pagës.
Nga të dhënat që disponon Drejtoria e Burimeve Njerëzore rezulton se numri i vakancave në sistem, për gjyqtarë është 136 vakanca (nga të cilat 75 të përhershme dhe 61 vakanca të përkohshme).
Megjithatë, sipas raportit, krahasuar me mesataren evropiane, numri i gjyqtarëve në raport me popullsinë, është ende i ulët./ekofin.al
