Stadiumi “Niko Dovana” mund të jetë e radhës që mund të bëhet me kullë. Siç e kishte paralajmëruar Korporata e Investimeve Shqiptare në faqen e saj, nisjen e procedurave së shpejti, Qeveria ka miratuar sot transferimin e pronave shtetërore në Durrës te Korporata e Investimeve Shqiptare për realizimin e projektit madhor të investimit “Rijetëzimi i stadiumit ‘Niko Dovana’”.
Sipas vendimit të Këshillit të Ministrave, Korporata do të veprojë si zhvillues i pronave, qoftë drejtpërdrejt, qoftë përmes entiteteve që mund të krijojë.
Brenda 30 ditëve nga hyrja në fuqi e vendimit, KISH dhe palët e tjera të përfshira duhet të lidhin marrëveshje bashkëpunimi, ku do të përcaktohen standardet, metodologjia dhe kushtet për zhvillimin e projektit, me qëllim realizimin e interesit publik dhe institucional.
Korporata është gjithashtu e autorizuar të hapë procedurë konkurruese për përzgjedhjen e një partneri privat që do të realizojë zhvillimin e pronës përmes një marrëveshjeje sipërmarrjeje. KISH mund të negociojë dhe lidhë kontrata me subjekte private, për realizimin e projektit, si dhe të ndërveprojë me Agjencinë e Kadastrës dhe institucionet përgjegjëse për planifikimin dhe zhvillimin e territorit.
Për të mundësuar zhvillimin e zonës, Korporata do të ketë të drejtë të procedojë me prishjen e objekteve ekzistuese në truallin që përfshihet në projekt. Vendimi i mëparshëm i qeverisë që i ngarkonte Fondit Shqiptar të Zhvillimit realizimin e këtij projekti është tashmë i shfuqizuar.
Për zbatimin e vendimit janë ngarkuar Bashkia Durrës, Federata Shqiptare e Futbollit, Ministria e Arsimit dhe Sportit, Komiteti Olimpik Kombëtar Shqiptar, Agjencia e Kadastrës dhe Korporata e Investimeve Shqiptare. Vendimi hyn në fuqi pas botimit në Fletoren Zyrtare.
