e-Ankesa është portali më i ri në dispozicion të biznesit, për ankimet e lidhura me prokurimet publike, koncensionet, lejet minerare etj.
Deputetja e Partisë Socialiste, Ermonela Felaj u shpreh sot se “ky është një tjetër instrument lehtësimi, në marrëdhënien ndërmjet Komisionit të Prokurimit Publik, biznesit dhe autoritetit kontraktor”.
Ajo e cilësoi e-Albania një instrument transparence dhe komunikimi në kohë reale.
Sipas Felaj, e-Albania është një instrument antikorrupsion, që na lejon të zhbëjmë më tej konstanten e papranueshme të korrupsionit që vret të mirën publike.
Gjatë aktivitetit të organizuar për prezantimin e këtij portali, Zv/Kryeministri Ahmetaj tha se “promovimi i e-Ankesa brenda platformës e-Albania është një ngjarje e vogël brenda një revolucioni të madh”.
“Është një ngjarje e vogël për një institucion të pavarur si KPP-ja, një ngjarje e madhe për sipërmarrjen dhe një ngjarje e madhe për transparencën dhe për luftën antikorrupsion. Kjo që bëjmë nuk është një proces i thjesht digjital, por proces transparence të thellë. Sipërmarrja nuk ka më nevojë të bëjë kilometra të tëra dhe orë të tëra për të sjellë ankesën në KPP, por edhe punonjësit e KPP-së nuk ka më nevojë të kenë kontakt të drejtpërdrejt me sipërmarrjen në funksion të transparencës dhe luftës antikorrupsion”, tha Ahmetaj.
