Një sipërfaqe rreth 6000 m2, në Prezë do të shërbej si poligon publik testimi manovrash parkimi si dhe një qendër edukimi e formimi për kursantë e subjekte të interesuara për simulime reale dhe virtuale. Ky është projekti i ri i DPSHTRR që pritet të realizohet, lajmin e ka njoftuar Drejtori i Përgjithshëm i Shërbimit të Transportit Rrugor, Blendi Gonxhja në rrjetet sociale.
“Një tjetër investim që provon rëndësinë e fokusit tonë tek rritja e standardeve të procesit të Testimit për Leje Drejtimit, monitorimit dhe transparencës, modernizimit të proceseve të shërbimit që lidhet me autoshkollat dhe kursantët për lejedrejtimi”, shprehet Gonxhja.
Gonxhja është shprehur se ky objekti i projektuar, 320 m2, do të kthehet në një hapësirë të teknologjisë më të fundit të simulatorëve mbi drejtimin e mjetit, pikë takimi për aktivitete edukative me moshat e reja si edhe stacion trajnimesh profesionale të sektorit të leje drejtimit.
Ai thekson se, projekti parashikon e-Monitorim ajror por edhe brenda në kabinë, live gjatë provimit, funksional ditën e natën, karikim mjetesh elektrike me energji alternative, parkime ndihmëse, sinjalistikë e mjete simulimi, instalime bashkëkohore, ambiente pritjeje
Sipas drejtorit të DPSHTRR-së ky poligon do të shërbejë për disa qarqe e bashki të Shqipërisë së mesme, me zgjedhje risku, për të rritur cilësinë e testimit praktik dhe transparencën në marrjen e Leje Drejtimit.
