Shtyhet afati për dorëzimin online në sistemin e tatimeve të dokumenteve të nevojshme në funksion të zbatimit të marrëveshjeve për shmangien e tatimit të dyfishtë. Sipas urdhrit të mëparshëm të ish-ministrit të Financave, Ervin Mete, “administrata tatimore merr masa që brenda gjashtëmujorit të parë të vitit 2025, të ofrojë për tatimpaguesit mundësinë e dorëzimit të dokumentacionit nëpërmjet sistemit elektronik dhe ngarkimit të dokumenteve të kërkuara.”
Duke qënë se nuk është arritur ende zhvillimi i sistemit për të mundësuar ngarkimin e të gjithë setit të dokumenteve online, Ministri aktual i Financave Malaj ka shtyrë afatin për në 1 janar 2026. Në këtë mënyrë deri në atë datë, tatimpaguesit do të vijojnë të dorëzojnë dorazi dokumentet me versionin hard copy ose me format elektronik me CD/USB.
Dokumentacionin për zbatimin e marrëveshjes për shmangien e tatimit të dyfishtë është si vijon:
a) Formulari online (deklaratë e digjitalizuar) sipas modelit të përcaktuar në aneksin 2, bashkëlidhur këtij udhëzimi, i cili mund të jetë i firmosur ose jo nga tatimpaguesi jorezident. Ky formular përmban të dhëna të plota për tatimpaguesin rezident tatimor në Shqipëri, për tatimpaguesin rezident tatimor në shtetin tjetër kontraktues dhe për llojin e pagesës së kryer nga tatimpaguesi rezident tatimor në Shqipëri (e ardhur për tatimpaguesin rezident tatimor në shtetin tjetër);
b) Kontratat e shërbimit me kompaninë jorezidente, në gjuhën/gjuhët që janë nënshkruar nga palët. Në rastet e kontratave komplekse dhe kur administrata tatimore ka vështirësi në zbërthimin dhe kuptueshmërinë e kontratave apo të natyrës së shërbimeve, struktura përkatëse, nëse e sheh të nevojshme, mund të kërkojë nga tatimpaguesi rezident tatimor në Shqipëri, përkthimin në gjuhën shqipe të kontratës, si dhe sqarime me shkrim në lidhje me termat e kontratës edhe llojin dhe natyrën e shërbimeve të furnizuara. Në çdo rast, si datë e depozitimit të dokumentacionit, llogaritet data fillestare e ngarkimit të dokumentacionit (formularit të aplikimit, kontratës dhe certifikatës së rezidencës). Nëse nuk ka kontratë të nënshkruar ndërmjet palëve, tatimpaguesi duhet të specifikojë dhe paraqesë nëpërmjet vetëdeklarimit në dokumentacionin e tij faktet e mëposhtme: – llojin e shërbimit të ofruar; – kohëzgjatjen e këtij shërbimi; – mënyrën e ofrimit të shërbimit (online, onsite); – nëse për ofrimin e shërbimit ka prezencë fizike në territorin e Republikës së Shqipërisë, të përcaktohet saktësisht kjo e fundit; – të ndahen pagesat për të drejtat e përdorimit, markat tregtare, licencat etj., në furnizimet e përziera (shërbim dhe pagesa për honorare).
c) Certifikatën e rezidencës për furnitorin (personin jorezident në Shqipëri) që është rezident në shtetin tjetër kontraktues. Certifikata e rezidencës që lëshohet nga autoritetet kompetente në shtetin 5 tjetër kontraktues duhet të përkthehet në gjuhën shqipe dhe ajo pranohet në formë elektronike apo në letër, në formatin e lëshuar nga ato autoritete të shtetit tjetër kontraktues. ç) Një listë analitike në formë tabelare dhe përmbledhëse të faturave të huaja (numër dhe datë e faturës, përshkrimi etj.) të lëshuara nga rezidenti tatimor në shtetin tjetër, për të cilat është zbatuar MSHTD-ja, ose dokumente të tjera mbi të cilat mbështetet transaksioni.
d) Një listë analitike në formë tabelare dhe përmbledhëse e informacioneve mbi pagesat e kryera nga tatimpaguesi rezident tatimor në Shqipëri për tatimpaguesin rezident tatimor në shtetin tjetër, përfshirë bankën ku është bërë transferta, si dhe datën dhe shumën e transferuar dhe për të cilat është zbatuar MSHTD-ja, apo të formave të tjera të shlyerjes/kompensimit të rëna dakord midis palëve.
Dokumentacioni i dorëzuar nga tatimpaguesi rezident tatimor në Shqipëri konsiderohet “Njoftim i administratës tatimore për zbatimin e MSHTD-së” dhe nuk është kërkesë për miratim nga administrata tatimore. Tatimpaguesi është përgjegjës, si për zbatimin e legjislacionit të brendshëm tatimor, ashtu edhe për marrëveshjet tatimore dhe janë strukturat e kontrollit tatimor ato që verifikojnë saktësinë e zbatimit të legjislacionit tatimor.
Dokumentacioni i listuar më lart duhet të ngarkohet në sistemin informatik tatimor, brenda vitit kalendarik që pason vitin në të cilin janë zbatuar dispozitat e MSHTD-së, pra vitit në të cilin është paguar fatura tatimore. Nëse sistemi informatik tatimor nuk mundëson ngarkimin elektronik të dokumentacionit, apo ka probleme teknike, tatimpaguesi dorëzon me shkresë zyrtare në letër dhe me një mbajtës elektronik (CD) dokumentacionin e kërkuar, pranë Drejtorisë së Përgjithshme të Tatimeve.
Shembull. Shoqëria “A”, që është rezidente tatimore në Shqipëri dhe me adresë në Tiranë, është furnizuar me shërbime gjatë vitit 2024 nga individi “X”, që është rezident tatimor në Itali, në bazë të një kontrate shërbimi. Pagesa e tatimit për këto shërbime të furnizuara gjatë vitit 2024 është bërë në përputhje me MSHTD-në e lidhur ndërmjet qeverisë së Republikës së Shqipërisë dhe qeverisë së Republikës së Italisë, “Për shmangien e tatimeve të dyfishta lidhur me tatimet mbi të ardhurat dhe mbi kapitalin dhe për parandalimin e evazionit fiskal”. Brenda datës 31 dhjetor 2025, shoqëria “A” ngarkon në sistemin elektronik tatimor dokumentacionin e listuar në pikën 3.1 të këtij udhëzimi, që provon zbatimin e MSHTD-së.
b) Nëse tatimpaguesi nuk ngarkon në sistemin informatik tatimor dokumentacionin brenda afatit të përcaktuar në paragrafin “a” të pikës 3.2, atëherë, ndaj tatimpaguesit, nga drejtoria rajonale tatimore përkatëse do të aplikohet një gjobë prej 10 000 (dhjetë mijë) lekësh për çdo muaj të paraqitjes me vonesë. Kjo gjobë aplikohet deri në 24 muaj pasues, pas përfundimit të afatit të përcaktuar në paragrafin “a” të pikës 3.2. Shembull. Referuar rastit të mësipërm, nëse shoqëria “A” ngarkon në sistemin informatik tatimor dokumentacionin pas datës 31 dhjetor 2025, atëherë, ndaj saj do të aplikohet një gjobë prej 10 000 (dhjetë mijë) lekësh për çdo muaj të paraqitjes me vonesë. Pra, për shembull, nëse shoqëria “A” ngarkon në sistem dokumentacionin në muajin mars të vitit 2026, ndaj saj do të aplikohet një gjobë prej 10 000 (dhjetë mijë) lekësh për muajin janar të vitit 2026, një gjobë prej 10 000 (dhjetë mijë) lekësh për muajin shkurt të vitit 2026, dhe një gjobë prej 10 000 (dhjetë mijë) lekësh për muajin mars të vitit 2026, duke përbërë një total gjobe në vlerën 30 000 (tridhjetë mijë) lekë. Sipas këtij shembulli, zbatimi i dispozitave të MSHTD-së është i vlefshëm, duke u aplikuar gjoba prej 10 000 (dhjetë mijë) lekësh për çdo muaj të paraqitjes me vonesë të dokumentacionit, nëse bëhet brenda datës 31 dhjetor 2027.
c) Nëse tatimpaguesi nuk paraqet dokumentacionin edhe pas kalimit të afatit prej 24 muajsh të përcaktuar në paragrafin “b” të pikës 3.2, atëherë tatimpaguesi humbet të drejtën e zbatimit të dispozitave të MSHTD-së dhe duhet të paguajë/kthejë tatimet e pa paguara apo pjesën e reduktuar të tatimit sipas MSHTD-së, si edhe gjobat dhe interesat për pagesë të vonuar në përputhje me ligjin nr. 9920, datë 19.5.2008, “Për procedurat tatimore në Republikën e Shqipërisë”, të ndryshuar. Shembull. Referuar rastit të mësipërm, nëse shoqëria “A” nuk e ngarkon në sistem dokumentacionin brenda datës 31 dhjetor 2027, atëherë ajo e humbet të drejtën e zbatimit të dispozitave të MSHTD-së dhe duhet të paguajë/kthejë tatimet e pa paguara apo pjesën e reduktuar të tatimit sipas MSHTD-së, si edhe gjobat dhe interesat për pagesë të vonuar në përputhje me ligjin nr. 9920, datë 19.5.2008, “Për procedurat tatimore në Republikën e Shqipërisë”, të ndryshuar. /ekofin.al
