Administrata Tatimore u ka bërë thirrje të gjithë individëve që rezultojnë me tatim të mbipaguar nga Deklarata Individuale Vjetore e të Ardhurave (DIVA 2025) të verifikojnë dhe, nëse është e nevojshme, të plotësojnë të dhënat e llogarisë së tyre bankare në sistemin elektronik e-Filing, në mënyrë që të mund të përfitojnë rimbursimin.
Sipas Administratës Tatimore, procesi i rimbursimit të tatimit të mbipaguar është në vijim, por nga verifikimet e kryera ka rezultuar se një numër qytetarësh nuk kanë regjistruar të dhënat e llogarisë bankare në sistem. Kjo pengon transferimin e shumës së rimbursimit në llogarinë e përfituesit.
Për të shmangur vonesat, Tatimet kanë publikuar një udhëzues të thjeshtuar, i cili shpjegon hap pas hapi procedurën për regjistrimin e llogarisë bankare në sistemin e-Tax. Udhëzuesi përfshin gjashtë hapa, duke nisur nga hyrja në sistem me kredencialet personale, kalimi në seksionin “eFiling Im”, zgjedhja e profilit të përdoruesit, hyrja te “Detajet e Bankës”, shtimi i një llogarie të re bankare dhe plotësimi i të dhënave si banka, SWIFT, IBAN dhe monedha, përpara ruajtjes së informacionit.
Administrata Tatimore sqaron se regjistrimi i saktë i këtyre të dhënave është një kusht i domosdoshëm për kryerjen e pagesës së rimbursimit, pasi fondet transferohen vetëm në llogarinë bankare të deklaruar nga tatimpaguesi.
Institucioni fton të gjithë individët që kanë dorëzuar DIVA 2025 dhe rezultojnë me të drejtë për rimbursim të mos e lënë këtë procedurë për në momentin e fundit, por të plotësojnë sa më parë informacionin bankar në e-Filing, në mënyrë që pagesa të kryhet pa pengesa dhe brenda afateve të parashikuara.
