Nga të përzierat e mëngjesit deri te artriti, xhenxhefili është përdorur për dekada për të trajtuar një sërë sëmundjesh falë vetive të tij anti-inflamatore.
Por tani, shkencëtarët thonë se suplementet e këtij përbërësi të kuzhinës mund të ndihmojnë në rregullimin e diabetit të tipit 2, duke ulur ndjeshëm nivelet e glukozës në gjak dhe duke zvogëluar rrezikun e sëmundjeve kardiovaskulare, dështimit të veshkave dhe goditjes në tru.
Diabeti, i quajtur shpesh “vrasësi i heshtur”, është një kërcënim në rritje. Faktorët e stilit të jetës, siç është mbipesha, rrisin ndjeshëm rrezikun e zhvillimit të kësaj gjendjeje, gjë që shpjegon edhe rritjen dramatike të rasteve.
I mrekullueshëm për raste të ndryshme
Në studimin e ri, të botuar në Frontiers in Pharmacology, shkencëtarët amerikanë analizuan pesë meta-analiza të hulumtimeve të mëparshme për të shqyrtuar nëse xhenxhefili mund të ndihmojë në trajtimin e inflamacionit, stresit oksidativ, një faktor rreziku për sëmundje serioze si kanceri, të vjellat e mëngjesit dhe diabetin e tipit 2.
Studiuesit zbuluan se xhenxhefili kishte përfitime në të katër rastet, me një reduktim të ndjeshëm të shënuesve kryesorë të inflamacionit dhe një reduktim të të përzierave dhe të vjellave gjatë shtatzënisë.
Megjithatë, zbulimi më interesant ishte efekti i fortë i xhenxhefilit në rregullimin glicemik, pasi i ndihmonte pacientët të menaxhonin më mirë karbohidratet, të cilat rrisin nivelet e sheqerit në gjak.
Përveç kësaj, u vu re një rritje e proteinës GLUT-4, e cila lehtëson thithjen e glukozës nga gjaku në muskuj dhe ind dhjamor, duke ruajtur kështu nivele të qëndrueshme të sheqerit në gjak.
Studimi tregoi gjithashtu se xhenxhefili ndihmon në uljen e indeksit HbA1c, një tregues kyç i rregullimit afatgjatë të sheqerit, gjë që forcon perspektivën e tij si një trajtim natyral për diabetin.
Vlen të përmendet se dozat e xhenxhefilit në studime varionin midis 1 dhe 3 gramëve në ditë, gjë që mund të ketë ndikuar në rezultate dhe ende nuk lejon përcaktimin e dozës ideale. Prandaj, shkencëtarët po planifikojnë prova klinike më të mëdha për të përcaktuar sasitë optimale dhe mënyrën më të mirë për të përfshirë xhenxhefilin në dietat e pacientëve.
Rreziqet shëndetësore të diabetit
Këto gjetje vijnë menjëherë pas të dhënave alarmuese që tregojnë se njerëzit e diagnostikuar me diabet të tipit 2 para moshës 40 vjeç kanë një rrezik katërfish më të lartë vdekjeje sesa popullata e përgjithshme.
Përveç kësaj, pacientët më të rinj kanë shkallë më të lartë të ndërlikimeve të lidhura me diabetin, veçanërisht dëmtimeve mikrovaskulare siç janë retinopatia diabetike dhe dështimi i veshkave, ndërsa diagnoza e hershme shoqërohet me më shumë vështirësi në kontrollin e niveleve të sheqerit në gjak.
