Depozitat e përfshira në paranë e gjerë kanë vijuar rënien edhe në muajin mars. Të dhënat më të fundit nga Banka e Shqipërisë tregojnë se shuma e depozitave të përfshira në paranë e gjerë pësoi një rënie me 0.6% në krahasim me shkurtin dhe 1.1% në krahasim me janarin. Konkretisht, në fund të muajit të kaluar, totali i depozitave ishte 1.38 trilionë lekë.
Depozitat e përfshira në paranë e gjerë i referohen të gjithë parave që qytetarët dhe bizneset mbajnë në bankë, pra paratë në llogaritë bankare, në llogari kursimi, në depozita afatshkurtra ose afatgjata dhe të tjera.
Për sa i përket monedhës, depozitat në valutë kapin vlera më larta se ato në lekë, megjithatë në muajin mars, si depozitat në lekë, ashtu dhe ato në monedhë të huaj rezultojnë me rënie. Depozitat në lekë llogariten në 645 miliardë lekë, 0.3% më pak se në shkurt. Ndërkohë, depozitat në valutë kapin një shifër prej 735 miliardë lekësh, edhe kjo një vlerë rreth 0.9% më e ulët se në muajin pararendës. Kështu, nga kjo kuptojmë se ndikimin më të madh në rënien e totalit të depozitave të përfshira në paranë e gjerë e kanë dhënë depozitat në valutë.
Sipas statistikave të Bankës Qendrore, depozitat e transferueshme, të cilat i referohen parave që ne mbajmë në llogaritë tona bankare, rezultojnë me shumat më të larta, ndjekur më pas nga depozitat me likuiditet të lartë (pra pa afat) dhe llojet e tjera të depozitave.
Depozitat e transferueshme në lekë kanë zbritur në 375 miliardë lekë në mars, ndërsa ato në valutë në 357 miliardë lekë. Nga ana tjetër, depozitat me likuiditet të lartë (depozitat pa afat) dhe depozitat e tjera në lekë rezultojnë me një rritje të lehtë prej përkatësisht 1.9% dhe 0.1%.
Ndërkohë, për sa i takon depozitave në valutë të përfshira në paranë e gjerë, shifrat flasin për një rënie të depozitave me likuiditet të lartë (depozitat pa afat) dhe vetëm për një rritje me gati 1.7% të llojeve të tjera të depozitave.
