Depozitat në sistemin bankar iu kthyen rritjes në qershor pas 3 muajsh rënie. Sipas të dhënave të Bankës së Shqipërisë, totali i depozitave në arriti në rreth 1.39 trilionë lekë, me një rritje mujore prej 0.3% krahasuar me majin.
Kjo rritje vjen kryesisht si rezultat i shtimit të kursimeve në monedhën kombëtare, që arritën në 655 miliardë lekë, me një rritje mujore prej 1.5% ose 10 miliardë lekë më shumë. Në të kundërt, kursimet në valutë pësuan rënie prej 0.7%, duke zbritur në 733 miliardë lekë. Kjo tendencë lidhet me zhvlerësimin e euros dhe normat e ulëta të interesit në këtë monedhë, të cilat kanë shtyrë qytetarët të zhvendosin kursimet drejt lekut.
Nga ana tjetër, të dhënat tregojnë se depozitat e transferueshme në lekë (paratë në llogaritë tona rrjedhëse) dominuan me 381 miliardë lekë, ndërsa ato në valutë ranë në 360 miliardë lekë. Rritje të lehtë shënuan edhe depozitat pa afat dhe ato të tjera në lekë, ndërkohë që në valutë pati rritje të depozitave me likuiditet të lartë, por rënien e llojeve të tjera të depozitave.
Në krahasim me një vit më parë, pra muaji qershor 2024, kursimet në lekë janë rritur me 64 miliardë lekë, ndërsa ato në euro me 564 milionë euro. Në total, kursimet lek/euro janë rritur me 1.17 miliardë euro brenda vitit. Fluksi i emigrantëve dhe rritja e parasë në qarkullim vlerësohen si faktorët kryesorë që kanë ndikuar pozitivisht në këtë ecuri.
