Ashtu siç kishte paralajmëruar, kryeministri Edi Rama ndau këtë të premte detaje mbi procedurat që do të ndiqen për kompensimin e dëmeve të shkaktuara nga zjarret që përfshinë vendin javët e fundit.
Sipas kreut të qeverisë, procesi do të zhvillohet në çdo bashki të prekur nga fatkeqësia natyrore, duke nisur nga evidentimi i dëmeve nga grupet e posaçme të ngritura me urdhër të kryetarëve të bashkive. “Vlerësimi dhe kompensimi i dëmeve të shkaktuara nga zjarret do të realizohet sipas një procedure të veçantë. Kujt i humbi shtëpia do t’ia rindërtojmë falas dhe kujt i humbën krerët do t’ia rifinancojmë një më një,” u shpreh Rama.
Procedurat hap pas hapi
Evidentimi i dëmeve
- Ngrihen grupet e konstatimit për inventarizimin e dëmeve.
- Inventarizimi përfshin banesat, infrastrukturën, bizneset, kulturat bujqësore, mjetet mekanike dhe objektet social-kulturore.
- Ngrihen gjithashtu grupet e vlerësimit sipas natyrës së dëmeve.
Vlerësimi i dëmeve
- Grupet e vlerësimit inspektojnë në terren dhe plotësojnë formularët me kostot financiare.
- Bashkitë përgatisin listat e subjekteve të dëmtuara dhe dokumentacionin përkatës.
- Në rast humbjeje jete, kërkohet vërtetimi mjeko-ligjor.
- Vlerësimi i dëmeve kryhet sipas kategorive:
• Banesa, objekte sociale, biznese dhe struktura bujqësore.
• Kultura bujqësore, mjete mekanike dhe gjë e gjallë – sipas çmimeve të tregut.
• Orendi dhe pajisje elektroshtëpiake – sipas çmimeve mesatare aktuale.
• Makineri dhe mallra biznesi – mbi bazën e dokumentacionit pranë organeve tatimore.
Kompensimi financiar
- Pas vlerësimit, bashkitë përcaktojnë koston e kompensimit.
- Pagesat kryhen përmes fondeve të bashkisë së prekur, nga fondi për mbrojtjen civile.
- Në mungesë fondesh, kompensimi planifikohet në buxhetin e vitit pasardhës.
- Nëse vlera e kompensimit tejkalon 8% të buxhetit bashkiak, kërkesa i dërgohet Agjencisë Kombëtare të Mbrojtjes Civile.
Qeveria thekson se qëllimi i këtyre procedurave është që çdo familje dhe subjekt i dëmtuar të marrë mbështetjen e duhur financiare, duke garantuar se asnjë prej tyre nuk do të mbetet pa ndihmë.
