Temperaturat e ulta që kanë përfshirë vendin tonë janë shoqëruar me reshje dëbore në Qarkun e Korçës, në Kukës-Ura e Zapodit, dhe në Pukë-Fushë Arrëz-Kukës. Për të mos lejuar bllokimin e rrugëve dhe që qarkullimi i automjeteve të vijojë pa probleme Autoriteti Rrugor ka dërguar punëtorët dhe mjetet borëpastruese me qëllim normalizimin e situatës nga dëbora në këto akse.
“Tregoni kujdes të shtuar gjatë drejtimit të mjetit në kohë me reshje, pajisuni me goma dimërore dhe zinxhirë kur udhëtoni për në zonat malore, ulni shpejtësinë, respektoni sinjalistikën dhe udhëzimet e Policisë Rrugore”, ka këshilluar qytetarët ARRSH.
Ndërkohë rreth 300 familje në zona të thella malore në Korçë kanë mbetur pa energji elektrike si pasojë e reshjeve të dëborës dhe ekipet e OSHEE-së kanë vështirësi për të ndërhyrë për shkak të kushteve të motit.
