Enti Rregullor i Energjisë ka miratuar në mbledhjen e sotme çmimet e reja të energjisë për vitin 2025 për konsumatorët familjarë.
Është vendosur që çmimi i energjisë të ulet në 8.5 Lekë/Kwh, pa TVSH, ose çmim final 10.2 Lekë/Kwh për familjarët që konsumojnë deri në 700 kilovat në muaj, ndërsa për ata që konsumojnë më shumë se këtë sasi, i gjithë çmimi do të faturohet me 9.5 lekë/kwh, ose 11.4 lekë me TVSH, aq sa ishte deri më sot.
Në këtë mënyrë, nuk është rikthyer aplikimi i faturimit me fasha, por një model tjetër, me faturim konsumi. Më herët, deri në vitin 2014, kur ERE vendosi njësimin e çmimit të energjisë, funksiononte faturimi me fasha, ku deri në 300 kwh çmimi ishte 7.7 lekë dhe për çdo kwh të shpenzuar mbi atë fashë çmimi ishte 13.5 lekë kwh.
Tarifat e reja do të hyjnë në fuqi në datën 1 shkurt 2025 dhe do të mbeten në fuqi të paktën për gjithë vitin, nëse nuk do të ketë ndryshime të tjera. Ulja e çmimit të energjisë ishte paralajmëruar më herët nga Qeveria, kjo edhe për shkak të përmirësimit të ndjeshëm të treguesve dhe performancës së mirë financiare të operatorëve të sektorit. /ekofin.al
