Euro dhe valutat e tjera kryesore janë forcuar më tej ndaj Lekut për të tretin ditë rradhazi. Sipas kursit zyrtar të publikuar nga Banka e Shqipërisë, Euro sot këmbëhej me 99.71 Lekë, me një rritje prej gati 1 Lek dhe duke iu afruar sërish kufirit të 100 Lekëve, gjë që nuk ndodhte nga shtatori i vitit të kaluar.
Thuajse të njëjtin vlerësim kanë patur edhe valutat e tjera kryesore ndaj Lekut. Kështu, dollari amerikan është këmbyer me 95.74, ose 1.1 Lek më shumë, paundi britanik 118.93, +1.14 më shumë sesa dje, ashtu si edhe franga zvicerane që është këmbyer me 105.7 Lek.
Ky nënvlerësim i Lekut mund të jetë i përkohshëm, ndikuar edhe nga hedhja e një sasie të mëdha parash në qarkullim dhe pagesave të realizuara nga Buxheti në periudhën e fundvitit, si edhe përgjatë muajin Janar. Gjithashtu, nuk përjashtohet edhe mundësia e blerjes së sasive të mëdha të valutës nga bankat tregtare për të plotësuar nevojat e klientëve të tyre, ose edhe për llogari të vetë bankave.
Leku në vitet e fundit është forcuar vazhdimisht në kursin e këmbimit me euron, duke e detyruar edhe Banka e Shqipërisë të shtojë operacionet e saj të blerjes së valutës. Ky forcim i Lekut ka mbajtur nën presion inflacionin, si edhe ka ndikuar në uljen e mëtejshme të Borxhit Publik. Në anën tjetër, ka goditur eksportet dhe në veçanti industrinë përpunuese fason. /ekofin.al
