Inteligjenca artificiale po shndërrohet me shpejtësi në një nga teknologjitë më tw pwrdorshme të kohës sonë, duke depërtuar pothuajse në çdo fushë të jetës. Nga përdorimi në shërbime të përditshme si aplikacionet e komunikimit dhe asistentët virtualë, te zgjidhjet komplekse për biznesin, shëndetësinë dhe arsimin, AI po ndryshon mënyrën se si njerëzit punojnë, mësojnë dhe ndërveprojnë me botën. Rritja e jashtëzakonshme e përdorimit të tyre tregon jo vetëm kuriozitetin, por edhe varësinë gjithnjë e më të madhe të shoqërisë moderne nga inteligjenca artificiale.
ChatGPT vijon të mbajë fronin në tregun e chatbot-ëve, duke regjistruar 46.59 miliardë vizita gjatë vitit 2025. Ky volum i jashtëzakonshëm përfaqëson 48.36% të gjithë trafikut të 10 chatbot-ëve kryesorë, katër herë më shumë se vizitat e kombinuara të tyre. Krahasuar me një vit më parë, përdorimi i ChatGPT është rritur me 106%, duke dëshmuar jo vetëm ruajtjen e epërsisë, por edhe zgjerimin e saj.
Në vendin e dytë renditet DeepSeek, me 2.74 miliardë vizita – më pak se 4% e tregut – por me një rritje marramendëse prej 48,848% krahasuar me vitin e kaluar. Pas tij qëndrojnë Gemini me 1.66 miliardë vizita dhe Claude me 1.15 miliardë vizita, duke shënuar ritme të forta rritjeje, megjithatë asnjë nuk i afrohet shtrirjes së ChatGPT.
Peizazhi i chatbot-ëve mbetet i copëzuar dhe dinamik. Platforma të reja si Grok (nga X) dhe Perplexity po fitojnë terren me ritme të shpejta, por mbeten ende shumë prapa. Ndërkohë, Poe, dikur i popullarizuar, pësoi një rënie të ndjeshme trafiku prej -46%. Mistral dhe Meta AI po shënojnë rritje, por pjesëmarrja e tyre në treg vijon të jetë nën 1%.
Të dhënat e publikuara nga OnelittleWeb tregojnë se chatbot-ët janë shndërruar tashmë në një ndërfaqe thelbësore për përdorimin e inteligjencës artificiale, qoftë për komunikim personal apo për funksione profesionale – nga hartimi i email-eve deri te përgjigjja ndaj pyetjeve komplekse./Përshtati nga Visual Capitalist, ekofin.al
