Pas kaosit të krijuar ditën e djeshme në aksin Vorë-Maminas ku mbetën të bllokuara automjetet në radhë kilometrike për orë të tëra, punimet janë ndërprerë.
ARRSH ka zhvilluar një takim me Policinë Rrugore me qëllim që të gjejnë një tjetër mënyrë për të kryer punimet në këtë aks. Kontrata e punimeve ka kohëzgjatjen prej një muaji, por është parashikuar që të përfundojë brenda dy javëve, 1 javë punime për njërën korsi dhe 1 javë për korsinë tjetër.
Një nga opsionet e mundshme është që ndërhyrjet për riparimin e asfaltit të bëhen në fasha orari, ose përgjatë natës. Por kjo do të vendoset përfundimisht me policinë rrugore dhe ARRSH, me qëllim që të ketë lehtësim të trafikut.
Punimet nisën ditën e djeshme, dhe drejtuesit e automjeteve ishin lajmëruar të përdornin rrugët dytësore Vorë-Maminas-Katër rrugët e Shijakut-Durrës, por si pasojë e fluksit të madh të makinave u krijua një trafik që zgjati me orë të tëra pothuajse në të gjithë kryeqytetin.
