Kryetari i Dhomës amerikane të Tregtisë z. Enio Jaço gjatë mbajtjes së forumit të përvistshëm me doganat ngriti shqetësimin e çmimit të referencave.
Z. Jaço përsëriti kërkesën për eleminimin e çmimit të referencave, pasi janë metoda të vjetra dhe të prapambetura.
“Kjo është një çështje e cila përfundimisht do një zgjidhje. Vizioni i AmCham në lidhje me tregtinë parashikon shkëmbimin e mallrave në mënyrë sa më të lehtë sa më sigurtë – dhe doganat janë institucioni kryesor që e bëjnë këtë të mundshëm. Unë e kam shumë të lehtë ta konstatoj por duhet një punë shumë e madhe nga donagat që ta sigurojnë këtë. Vizioni jonë është që të kemi eksporte më të fuqishme shqiptare.
Disa nga ju këtu keni produke vërtetë me cilësi që mund të konkurrojnë në tregje globale – oportuniteti i të cilave është bërë akoma më i madh në ditët e sotme në kushtet e presioneve globale, luftës në Ukrainë etj. Edhe njëherë institucioni i doganave luan një rol shumë të rëndësishëm këtu. Por gjithashtu edhe tregtia elektronike është në qendër të vizionit tonë ashtu si edhe procedurat e lehtësuara elektronike – jam i bindur që janë gjithashtu edhe në vizionin e doganave”, pohoi ai.
Kreu i Dhomës Amerikane të Tregtisë gjithashtu vlerësoi bashkëpunimin me doganat, si dhe ndërveprimin e tyre me institucione ndërkombëtare si Banka Botërore për realizmin e reformave.
Drejtori i Përgjithshëm i Doganave, z. Genti Gazheli theksoi se janë shqyrtuar shqetësimet e biznesit për metodat e vlerësimit ose siç njihen “çmimet e referencës” nëpërmjet komunikimit interaktiv me antarët e Amcham, duke dhënë zgjidhjet e duhura pa vonesë dhe jemi të disponueshëm për komunikimin e hapur. “Kemi ulur ndjeshëm përdorimin e çmimeve të referencës dhe kemi rritur përdorimin e transaksionit(marrjen parasysh të çmimit të faturës). Për periudhën janar-maj 2022 është regjistruar shifra më e lartë e përdorimit të transaksionit në rreth 96 % të rasteve, shumë pranë mesatares së Bashkimit Europian (98%). Rritja e përdorimit të transaksionit është një ndër prioritetet në strategjinë e faciliteteve ndaj biznesit, por sigurisht jemi këtu së bashku me kolegë të DP Doganave për të diskutuar të gjitha shqetësimet e anëtarëve të AmCham”, veçoi ai. Referuar rezultateve të pyetësorit të AmCham dhe shoqatave të biznesit kreu i Doganave z. Gazheli tha se besimi i biznesit në dogana është rritur. “Rreth 67 % e bizneseve mendojnë se klima është përmirësuar gjatë vitit 2021 ndërkohë që lidhur me pyetjen se si e vlerësojnë etikën e punës në Dogana 57.5 % shprehen “shumë mirë” dhe 33.8 % “mirë”, pohoi ai referuar rezultateve të anketës.
