Të ardhurat nga tatimi mbi të ardhurat personale për periudhën janar–maj 2025 kanë arritur në 34.1 miliardë lekë, duke u rritur me 7.3 miliardë lekë ose 27.2% krahasuar me pesëmujorin e parë të vitit 2024. Shifrat rezultojnë gjithashtu në 4.5 miliardë lekë ose 15.1% mbi planin e vendosur për këtë periudhë.
Sipas raportit të Ministrisë së Financave, ndikim në këtë rritje ka pasur tatimi mbi deklaratën individuale vjetore (DIVA), ku të ardhurat u rritën me 39.9%, pas plotësimit të deklaratës për vitin 2024 nga individët me të ardhura mbi 1.2 milionë lekë, si dhe tatimi mbi dividentët dhe aksionet, i cili shënoi një rritje prej 10.8% krahasuar me një vit më parë.
Nga të dhënat e Administratës Tatimore, në total, nga 143,369 individë që kishin detyrimin për të dorëzuar deklaratën DIVA për vitin 2024, 127,381 individë e kanë plotësuar atë. Ky detyrim përfshinte të gjithë individët rezidentë dhe jo-rezidentë me pagë bruto mbi 1.2 milionë lekë në vit, të dypunësuarit, si dhe ata që kishin të ardhura shtesë mbi 50 mijë lekë në vit për të cilat nuk ishte mbajtur tatimi në burim.
Një element i ri në këtë proces ishte deklarimi për herë të parë i të ardhurave nga platformat online si Booking dhe Airbnb.
Po sipas raportit të Financave, të ardhurat nga tatimi mbi pagat dhe burime të tjera personale kanë shënuar gjithashtu rritje të ndjeshme gjatë pesëmujorit të parë 2025. Më konkretisht, Nga sektori privat u arkëtuan 12.7 miliardë lekë ose 26% më shumë se në të njëjtën periudhë në 2024, ndërsa nga sektori publik 7.6 miliardë lekë ose 27.2% më shumë, rritje që lidhet kryesisht me efektin e rritjes së pagave të nisur në korrik 2024.
Vetëm në maj 2025 janë mbledhur 317 milionë lekë më shumë tatim mbi pagën në sektorin publik krahasuar me majin 2024. Ndërkohë, tatimi mbi interesat solli 1.6 miliardë lekë ose 18.8% më shumë dhe tatimi nga shitja e pasurive të paluajtshme arriti në 3.5 miliardë lekë ose 26.3% më shumë se pesëmujori i vitit 2024/ekofin.al
