Bankat evropiane kanë hasur në debitime të paautorizuara të përhapura nga llogaritë e PayPal, tha Shoqata Gjermane e Bankave të Kursimeve (DSGV).
Gazeta gjermane Sueddeutsche Zeitung (SZ) raportoi se pagesa me vlerë rreth 10 miliardë eurosh (8.6 miliardë £) janë dashur të bllokohen, pasi sistemi i kontrollit kundër mashtrimeve të PayPal dështoi.
Ajo tha se pagesat u pezulluan të hënën, kur huadhënësit raportuan miliona debitime të dyshimta direkte nga kompania e pagesave.
DSGV konfirmoi për BBC se kishte pasur “incidente që përfshijnë debitime të paautorizuara të nisura nga PayPal ndaj institucioneve të ndryshme kreditore”.
BBC i është drejtuar PayPal për një koment.
PayPal i tha Reuters se “disa transaksione nga partnerët tanë bankarë dhe potencialisht klientët e tyre” ishin prekur nga një ndërprerje e përkohshme shërbimi.
“Ne identifikuam shpejt shkakun dhe po punojmë ngushtë me partnerët tanë bankarë për të siguruar që të gjitha llogaritë të jenë përditësuar,” tha një zëdhënës i PayPal.
DSGV tha se PayPal kishte “pranuar ndërprerjet” dhe kishte “siguruar” që problemi ishte zgjidhur.
“Transaksionet e pagesave drejt dhe nga PayPal po funksionojnë sërish normalisht,” tha ajo.
“Këto incidente patën pasoja të rëndësishme në transaksionet e pagesave në të gjithë Evropën, veçanërisht në Gjermani. Autoritetet mbikëqyrëse janë informuar gjithashtu për incidentet tek PayPal.”
PayPal synon të filtrojë mashtrimet përpara se ato të arrijnë në banka përmes një sistemi sigurie.
Në veçanti, synon të përballojë debitimet e rreme që ngrihen nga kriminelët.
Ka shumë mënyra për t’i ngritur ato, por një metodë tipike është mashtrimi i një personi që të japë të dhënat e tij duke u shtirur si bankë ose institucion financiar përmes telefonit.
Sipas SZ, sistemi i filtrimit të PayPal nuk funksionoi siç duhet të hënën, duke sjellë që debitime të pakontrolluara t’u dërgoheshin bankave së bashku me ato legjitime.
Aksionet e kompanisë së pagesave ranë me 1.9% të mërkurën pas raportit./Përshtati nga BBC, ekofin.al
