Banka Shqiptare e Zhvillimit ka hapur disa thirrje të reja për vende vakante, ndërsa vijon procesin e ngritjes institucionale dhe fillimit të operacioneve si bankë shtetërore zhvillimore. Institucioni, i krijuar me ligjin nr. 23/2025, po kërkon profesionistë me eksperiencë në sektorin bankar, financë dhe menaxhim projektesh për të ndërtuar strukturat kryesore operacionale të bankës.
Sipas shpalljeve të publikuara, Banka Shqiptare e Zhvillimit ka hapur pesë pozicione të nivelit të mesëm dhe menaxherial, duke sinjalizuar se fokusi aktual mbetet ngritja e funksioneve bazë të kreditimit, thesarit, kontrollit financiar dhe administrimit operacional.
Pozicionet e shpallura janë Specialist i Lartë për Administrimin e Kredisë dhe Back Office, Specialist i Lartë i Planifikimit dhe Kontrollit, Menaxher Projekti, Specialist i Lartë Thesari dhe Specialist i Lartë për Analizën dhe Vlerësimin e Kredive.
Në të gjitha pozicionet kërkohet eksperiencë e mëparshme në banka ose institucione financiare, njohuri shumë të mira të gjuhës angleze dhe aftësi të avancuara në analizë financiare, operacione bankare apo menaxhim procesesh. Banka vë theks të veçantë tek profesionistët që mund të kontribuojnë në ndërtimin nga e para të proceseve të kontrollit, raportimit dhe administrimit operacional.
Për pozicionin e Specialistit të Lartë të Thesarit kërkohen ekspertë me eksperiencë në menaxhimin e likuiditetit, tregjet financiare dhe instrumentet e investimit, ndërsa për Specialistin e Analizës dhe Vlerësimit të Kredive kërkohet eksperiencë në underwriting, kreditim SME dhe analizë të riskut kreditor.
Ndërkohë, pozicioni i Menaxherit të Projektit synon koordinimin e ngritjes operacionale të bankës, duke përfshirë bashkëpunimin me konsulentë, këshilltarë dhe institucione të tjera financiare.
Banka thekson se ndodhet ende në fazën e ndërtimit institucional, ndaj kandidatët idealë duhet të jenë të aftë të punojnë në një mjedis në zhvillim, ku procedurat, strukturat dhe sistemet janë ende duke u krijuar. Banka synon të luajë rol kyç në financimin e SME-ve, projekteve strategjike dhe zhvillimit ekonomik të vendit, duke adresuar boshllëqet e financimit në ekonomi.
Aplikimet duhet të dërgohen në adresën [email protected], të shoqëruara me CV në anglisht, letër motivimi dhe dokumentacionin mbështetës. /ekofin.al
