Autoriteti i Dosjeve ngre shqetësimin se bashkitë në një masë të gjerë e shpërfillin në rastin e vendimeve për emërtimin e rrugëve, shesheve, apo kur propozojnë tituj nderi për persona të caktuar. Sipas Autoritetit për Informimin mbi Dokumentet e Ish Sigurimit të Shtetit, gjatë vitit 2024, vetëm 26% e bashkive kanë vlerësuar zbatimin korrekt të ligjit dhe kanë paraqitur kërkesë për të bashkëpunuar për të kryer procesin e verifikimit të figurës së personave që propozohen për tituj nderi apo emërtimin e hapësirave publike me emra personalitetesh.
Në anën tjetër, 25% se ¼ e bashkive kanë vijuar të japin tituj nderi apo të vendosin emërtesa të rrugëve, shesheve, hapësirave publike dhe monumenteve historike, kulturore, lapidarëve, me data, emra dhe simbole që lidhen me të kaluarën e regjimit komunist, pa zhvilluar procedurat e verifikimit të pastërtisë së figurës të shtetasve të propozuar.
Në total për periudhën Janar – Dhjetor 2024, në Autoritet janë paraqitur 82 kërkesa për verifikimin e 263 kandidatëve, ku janë verifikuar 251 kandidatë nga të cilët për 25 kandidatë figurojnë në dokumente të ish-sigurimit të shtetit si bashkëpunëtorë të ish Sigurimit të Shtetit, si ndihmës gjyqtarë, hetues dhe dëshmitar në procese politike dhe nga Autoriteti janë marrë 92 vendime.
Nga këto 92 vendime, 56 prej tyre i përkasin bashkive dhe nga 61 bashki në shkallë vendi, vetëm 16 prej tyre kanë paraqitur kërkesa për konfirmim dhe verifikim tek Autoriteti i Dosjeve.
Përveç kërkesave të pushtetit vendor për verifikim të kandidatëve për emërtimin e hapësirave të territorit publik dhe tituj nderi apo dekorim të shtetasve, Autoriteti ka kryer gjithashtu edhe procedura verifikuese me kërkesë te veçantë nga institucionet përpara emërimit apo zgjedhjes së kandidatëve në poste publike. /ekofin.al
