Kompania “Grant Thornton” SHPK është përzgjedhur fituese për një nga lotet e kontratës për auditimin e jashtëm të projekteve dhe granteve me financim të huaj, një proces që mbulon periudhën 2024–2026 dhe përfshin disa nga programet më të mëdha të financuara nga partnerët ndërkombëtarë në Shqipëri.
Sipas dokumentacionit, objekti i tenderit lidhet me “Auditimin e jashtëm të projekteve dhe granteve me financim të huaj për vitet 2024, 2025 dhe 2026”, i ndarë në dy lote: një për projektet e financuara nga Banka Botërore dhe një tjetër për projektet e financuara nga donatorë të tjerë. “Grant Thornton” është shpallur fituese për lotin e dytë.
Fondi limit total i procedurës arrin në 8.8 milionë lekë pa TVSH, ndërsa për këtë lot fondi limit ishte 4,515,000 lekë pa TVSH. Në përfundim të procedurës, kontrata është lidhur me vlerë 1,764,000 lekë me TVSH, shumë kjo që përfaqëson ofertën fituese për realizimin e auditimit.
Auditimi do të përfshijë një gamë të gjerë projektesh strategjike të financuara nga institucione si Banka Botërore, EBRD, KfW, fondet e BE-së dhe donatorë të tjerë. Mes tyre përfshihen projekte për furnizimin me ujë në zonat rurale, zhvillimin urban dhe ekonomik, infrastrukturën dhe turizmin, rrugët lidhëse rajonale, rikualifikimin e vijës bregdetare Vlorë–Radhimë–Orikum, si dhe programe si ai i rindërtimit dhe projektet e Fondit Shqiptar të Zhvillimit.
Sipas termave të referencës, auditimi synon të verifikojë përdorimin e fondeve sipas marrëveshjeve të financimit, respektimin e procedurave të prokurimit sipas standardeve të donatorëve, si dhe funksionimin e sistemeve të kontrollit financiar dhe menaxhimit të projekteve.
Kontrata është nënshkruar më 5 mars 2026 dhe pritet të përfundojë më 5 maj 2026.
Ky auditim konsiderohet me rëndësi të veçantë për forcimin e transparencës dhe llogaridhënies në menaxhimin e fondeve të huaja në Shqipëri./ekofin.al
