Prindër, nëse do të doni të informoheni në kohë reale në lidhje me notat, mungesat, ecurinë, aktivitet jashtëshkollore të fëmijës tuaj, mjafton të shkarkoni në aparatin tuaj celular aplikacionin “SMIP”. Nëpërmjet një videoje që pasqyron detaje nga ky aplikacion i ri, Ministrja e Arsimit dhe Sportit Evis Kushi, ka promovuar këtë platformë digjitale e cila u vjen në ndihmë prindërve apo kujdestarëve ligjor që kanë fëmijët në sistemin parauniversitar.
“Prindër të dashur! Platforma digjitale SMIP tani ju vjen në ndihmë për t’u informuar në kohë reale në mënyrë të detajuar, kudo dhe kurdo, mbi notat, mungesat, sjelljen apo aktivitetet jashtëshkollore të fëmijëve tuaj. Mjafton të shkarkoni aplikacionin SMIP në telefonin tuaj dhe ndiqni hapat e shpjeguara në video për çdo detaj”, shkruan ministrja.
Hyrja në këtë platformë bëhet me kredencialet që përdoren në portalin e-Albania. Pasi klikohet butoni vazhdo, shfaqet emri i fëmijës apo fëmijëve përkatës, ose e atyre që janë nën kujdestari ligjore. Për të parë instrukisonet mbi platformën e komunikimit mësues-nxënës-prindër shihni videon në këtë link, https://www.facebook.com/kushievis/videos/465108362347425/
