Të dhënat e Autoritetit të Mbikëqyrjes Financiare (AMF) tregojnë se primet bruto për 11 muaj arritën vlerën e 20.5 miliardë lekëve, në rritje me 8.4% krahasuar me të njëjtën periudhë të vitit të kaluar. Referuar të dhënave, tregu i sigurimeve këtë vit ka shfaqur një ecuri pozitive, edhe falë shtysës që kanë dhënë produktet e lidhura me rritjen e turizmit. Disa prej produkteve kryesore të sigurimit vullnetar, si sigurimet e pronës apo sigurimi KASKO i mjeteve kanë shënuar ritme dyshifrore të rritjes.
Po ashtu, edhe produktet e sigurimit të detyrueshëm motorik po vijojnë rritjen, por me ritme mesatarisht më të ulëta. Sigurimet e detyrueshme për përgjegjësitë ndaj palëve të treta u rritën me 7% për 11-mujorin, ndërsa pesha e tyre specifike ndaj totalit të primeve të shkruara bruto zbriti në 66.3%, rreth një pikë përqindje më pak krahasuar me një vit më parë.
Ndërsa norma më e lartë e rritjes erdhi në sigurimin e brendshëm TPL, me 8.3%, ndërsa Kartoni Jeshil dhe Polica Kufitare kanë regjistruar rritje modeste, mes 1% dhe 2%. Megjithatë, kjo lidhet me efektin e fortë negativ statistikor të kursit të këmbimit.
