Tregjet financiare nën mbikëqyrjen e Autoriteti i Mbikëqyrjes Financiare (AMF) e mbyllën vitin 2025 me rritje dyshifrore të aktiveve. Sipas raportit vjetor, totali i aktiveve në këto tregje arriti në 149 miliardë lekë, me një rritje prej 13% krahasuar me vitin 2024. Ky zhvillim reflekton një dinamikë pozitive në disa segmente kryesore, veçanërisht në sigurime, fondet e investimeve dhe pensionet private.
Tregu i sigurimeve vijoi të përmirësojë treguesit financiarë, duke shënuar rritje si në aktive ashtu edhe në volum aktiviteti. Aktivet u zgjeruan me rreth 6.38 miliardë lekë, ose 11.2% në bazë vjetore, ndërsa provigjonet teknike u rritën me 9.5%, duke përforcuar më tej qëndrueshmërinë financiare të sektorit. Njëkohësisht, treguesi i mbulimit të provigjoneve me aktive të përshtatshme u përmirësua, duke reflektuar një menaxhim më të mirë të riskut.
Në aspektin e aktivitetit, primet e shkruara bruto arritën në rreth 27.1 miliardë lekë, në rritje me 10.56% krahasuar me një vit më parë. Ndërkohë, dëmet e paguara bruto u rritën me vetëm 0.82%, në 8.26 miliardë lekë.
Paralelisht, tregu i sipërmarrjeve të investimeve kolektive (SIK) ruajti një trajektore të fortë rritjeje. Aktivet neto arritën në 70 miliardë lekë, me një rritje prej 14.19% në bazë vjetore, të mbështetur kryesisht nga fondet e investimeve me ofertë publike. Numri i investitorëve u rrit në 42,138, ose 11.52% më shumë se në vitin 2024, duke reflektuar zgjerimin e bazës së pjesëmarrësve dhe rritjen e interesit për instrumentet e tregut të kapitalit.
Zhvillimet në këtë treg janë shoqëruar edhe me diversifikim të produkteve, përfshirë hyrjen e fondeve të reja dhe kërkesat për njohjen e fondeve të licencuara në Bashkimin Europian, çka sinjalizon një hap të mëtejshëm drejt integrimit me tregjet ndërkombëtare, thekson AMF.
Edhe tregu i fondeve të pensionit privat vijoi trendin rritës, si në aktive ashtu edhe në numrin e kontribuuesve. Në fund të vitit 2025, aktivet neto arritën në 9.85 miliardë lekë, me një rritje të fortë prej 21.55%, ndërsa numri i anëtarëve u rrit në 49,218 (+11.19%). Investimet e këtij tregu mbeten të përqendruara kryesisht në tituj të borxhit publik, ku obligacionet e qeverisë zënë mbi 96% të portofolit, duke reflektuar një profil konservator të menaxhimit të aseteve. /ekofin.al
