Société Générale planifikon të shkurtojë 1.800 vende pune në Francë përmes “largimit natyror”, një hap që sindikatat thonë se u paraqit pasi u çmontuan garancitë kyçe të punësimit.
Grupi bankar francez Société Générale synon të reduktojë 1.800 vende pune në Francë deri në fund të vitit 2027, si pjesë e një riorganizimi të gjerë, sipas një deklarate të sindikatës CGT, e cila thotë se plani iu prezantua përfaqësuesve të stafit pa një paketë të dedikuar mbështetjeje.
Deri pasditen e së enjtes në Evropë, aksionet e Société Générale tregtoheshin mbi 2% më lart pas lajmit, në kuadër të një rritjeje më të gjerë të tregjeve në kontinent.
Shkurtimet e propozuara vijnë vetëm disa javë pas nënshkrimit të një marrëveshjeje të re punësimi që mbulon periudhën 2026–2028 dhe, sipas sindikatës, do të realizohen përmes largimit natyror, e jo përmes skemave të pensionimit të parakohshëm apo largimeve vullnetare.
Menaxhmenti pritet ta dorëzojë zyrtarisht dosjen e ristrukturimit tek sindikatat të enjten, së bashku me një komunikim të brendshëm më të gjerë.
Reagimi i sindikatave për kohën e njoftimit
Në një deklaratë pas një takimi me drejtues të lartë, përfshirë sekretarin e përgjithshëm të grupit Alexis Kohler, CGT tha se sindikatat u thirrën individualisht për t’u informuar mbi planet e riorganizimit, në vend që të konsultoheshin paraprakisht.
“Qasja nuk është as korrekte, as e ndershme dhe sigurisht jo konstruktive,” tha sindikata, duke shtuar se kishte kërkuar diskutime mbi riorganizimet e planifikuara që nga mesi i vitit 2025.
CGT kritikoi gjithashtu menaxhmentin për ecjen përpara vetëm pasi u çmontuan garancitë e përfshira në marrëveshjen e mëparshme të punësimit 2019–2025 dhe për zhbërjen paralelisht të rregullimeve të tjera, përfshirë punën në distancë.
“Menaxhmenti priti derisa të kishte çmontuar garancitë dhe mekanizmat e marrëveshjes së punësimit 2019–2025 përpara se të na thërriste,” thuhet në deklaratë.
Menaxhmenti flet për një “fazë të re”
Sipas përshkrimit të sindikatës mbi takimin, Kohler u tha përfaqësuesve se banka duhet të hyjë në një “fazë të re” pas arritjes së objektivave kyçe të përcaktuara në ditën e tregjeve të kapitalit.
Menaxhmenti e ka paraqitur riorganizimin si pjesë të një transformimi më të gjerë për ta bërë grupin “më agil dhe operacional”, duke përfshirë reduktimin e niveleve hierarkike dhe ngushtimin e hapësirës së menaxhimit.
Plani lidhet gjithashtu me marrëveshjen e re të punësimit, e cila i jep përparësi mobilitetit të brendshëm, rikualifikimit dhe një rekrutimi të kufizuar të jashtëm.
Në disa vite, ndryshimet do të çonin në një reduktim neto prej 1.800 pozicionesh nga një forcë pune në Francë prej rreth 40.000 punonjësish. Menaxhmenti argumenton se një normë largimi natyror rreth 5% në vit nënkupton se nuk ka nevojë për masa shtesë mbështetëse, si skemat e largimit vullnetar.
Shtrirja e ristrukturimit
Plani prek shumicën e operacioneve të retail-it dhe të mbështetjes së Société Générale në Francë, megjithëse disa njësi biznesi përjashtohen, pasi kanë kaluar tashmë ristrukturime muajt e fundit.
Brenda Société Générale Réseau France (SGRF), planifikohen 650 shkurtime vendesh pune në nivel lokal dhe 340 të tjera në selinë qendrore kombëtare. Rrjeti do të riorganizohet nga 11 rajone në nëntë, me rishikim të kufijve rajonalë dhe delegim më të madh të kompetencave vendimmarrëse.
“Të gjithë kolegët do të kenë një pozicion, bazuar në aftësitë e tyre dhe brenda zonës së tyre lokale të punësimit,” citohet të ketë thënë Valérie Migrenne, drejtoreshë e burimeve njerëzore në SGRF, sipas sindikatës. “Do ta menaxhojmë këtë me kalimin e kohës, me bashkëpunim të ngushtë dhe në mënyrë individuale.”
Menaxhmenti ka paraqitur gjithashtu plane për centralizimin e disa funksioneve, krijimin e platformave kombëtare për fusha si parandalimi i mashtrimeve dhe forcimin e bashkëpunimit mes ekipeve digjitale dhe atyre të të dhënave.
Operacionet e trajnimit do të konsolidohen brenda SG University.
Konteksti më i gjerë
Bankat franceze janë nën presion për të ulur kostot dhe për të thjeshtuar strukturat, në një mjedis me kërkesa gjithnjë e më të larta për përputhshmëri rregullatore, digjitalizim dhe rritje të dobët në banking-un tradicional me pakicë.
Société Générale ka kryer tashmë disa valë ristrukturimi vitet e fundit, përfshirë shkurtime vendesh pune në banking-un e investimeve dhe menaxhimin e aseteve.
Megjithatë, sindikatat kanë paralajmëruar vazhdimisht se mbështetja te largimi natyror rrezikon të rrisë ngarkesën e punës dhe të dëmtojë cilësinë e shërbimit, veçanërisht në rrjetet rajonale.
“Për CGT-në, dispozitat e marrëveshjes së re të punësimit nuk do të jenë të mjaftueshme,” tha sindikata.
Dosja e ristrukturimit pritet t’u dorëzohet zyrtarisht sindikatave më 22 janar. Brenda një jave pritet të porositet një vlerësim nga ekspertë, i ndjekur nga konsultime me organet përfaqësuese të punonjësve në njësitë e prekura.
Menaxhmenti synon mbajtjen e një mbledhjeje plenare të jashtëzakonshme deri në fund të prillit./Përshtati nga Euronews, ekofin.al
