Nuk janë aq të paktë ata drejtues që nuk sigurojnë makinën e tyre ose largohen nga vendi i ngjarjes, pasi kanë kryer një aksident duke qenë të pasiguruar. Çfarë ndodh në të tilla raste? Kompanitë e sigurimit kontribuojnë çdo vit për një Fond, i cili përdoret për të kompensuar dëmet e personit ose të makinës kur këto të fundit nuk janë siguruar në mënyrë të drejtpërdrejtë.
Sipas raportit vjetor të Autoritetit të Mbikëqyrjes Financiare (AMF), nga Fondi i Kompensimit janë paguar 245 milionë lekë dëme në 2025. Nga 250 milionë lekë që ishte përafërsisht Fondi total i Kompensimit kushtuar mbulimit të rasteve të tilla, vetëm 98.5% e kësaj vlere të fondit vjetor të miratuar rezulton të jetë përdorur, ndërsa ka akoma dëme pezull që nuk janë paguar.
Po ashtu, Fondi i Kompensimit për të dëmshpërblyer ata që nuk paguajnë për t’u siguruar drejtpërdrejt nga kompanitë e sigurimit, rezulton të jetë përdorur 30% më pak se në 2024, ku vlera e dëmeve të shlyera nga fondi ishte 350 milionë lekë.
Autoriteti i Mbikëqyrjes Financiare ka vijuar monitorimin e Byrosë Shqiptare të Sigurimit (BSHS), me fokus uljen e mëtejshme të dëmeve pezull objekt i fondit të kompensimit. Gjatë vitit të kaluar, dëmet pezull u ulën me 8.7% krahasuar me vitin 2024.
Rreth 70% e rasteve të aksidenteve të shkaktuara nga mjetet e pasiguruara apo të paidentifikuara, janë trajtuar dhe paguar me procedura të përshpejtuara, drejtpërdrejt nga shoqëritë e sigurimit. Zakonisht, dëmet në makinë nuk janë kompensuar kur mjeti ka qenë i paidentifikuar.
Nga ana tjetër, kultura e sigurimit në Shqipëri vijon të jetë shumë larg vendeve të tjera.
Mesatarja e penetrimit të sigurimeve në vendet e OECD gjatë 2015–2024 është rreth 6.2% e Prodhimit të Brendshëm Bruto (PBB), duke pasqyruar tregje të zhvilluara dhe një nivel të lartë të përdorimit të produkteve të sigurimit. Ndërsa vendet e Ballkanit lëvizin midis 1–2%, Shqipëria mbetet rreth 1%, ose gjashtë herë më poshtë se mesatarja e OECD, që tregon një treg ende në fazë zhvillimi e me potencial të konsiderueshëm për zhvillim./Scantv
