Zv/kryeministri Arben Ahmetaj, deklaroi sot se, në Shqipëri janë mbështetur të gjitha shtresat. Në fjalën e tij në Kuvend gjatë diskutimeve mbi Aktin Normativ për kompensimin financiar të çmimit për disa materiale ndërtimi.
Ahmetaj foli për subvencionet dhe kompensimet që ka bërë qeveria këto 3 vite krize, në 3 kriza të ndryshme.
“E para, është marrë me qytetarët që kanë humbur shtëpitë. Një filozofi e drejtpërdrejtë sociale subvencionuese, shtëpi falas, grante për të rindërtuar apo për të meremetuar shtëpitë. E paprecedentë nga ana sociale. E paprecedentë në asnjë vend. Asnjë vend s’e ka bërë, kanë dhënë kredi dhe kreditë kanë zgjatur dhe me nga 25 dhe 30 vite”, tha Ahmetaj.
“E dyta, në pandemi injektoi për familjet në nevojë dhe preku gati gjysëm milionë qytetarë. Dhe sot është fakt, ju ftoj ta shihni edhe politikisht edhe teknikisht, edhe si qytetarë, apo si deputetë se çfarë ndodhi me ekonominë. Banka Botërore e ka thënë, 50 mijë vende pune u shpëtuan nga ajo që bëri qeveria”, theksoi Ahmetaj.
“Po pastaj çfarë ndodhi? Vjen kategoria e dytë. Qytetarë të cilët kanë sipërmarrje të vogla, të cilët paguajnë zero taksa. Pra vazhdimësia e një filozofie në mbështetje të qytetarëve të zakonshëm dhe atyre që kanë më shumë nevojë.Taksa zero, ma gjeni precedentin në Evropë, po deshët dilni dhe përtej. Në rajon po e po, nuk ka. Kjo është filozofia e mbështetjes së një zhvillimi ekonomik me sytë tek qytetari i zakonshëm. Taksa zero për biznesin e vogël”, u shpreh Ahmetaj.
“Po ata që paguhen më pak? Pjesa më e madhe e tyre nuk paguajnë asnjë taksë. Është e drejtë nuk do t’i taksojmë. Madje tavanin në vazhdimësi do ta rrisim”, tha Ahmetaj.
“Me pandeminë, u injektua një paketë për të ndihmuar biznesin e vogël dhe biznesin e madh. E njëjta filozofi. Nuk ka asnjë lloj diference dhe asnjë lloj ndryshimi në atë piketim tek qytetari i zakonshëm dhe tek sipërmarrja e vogël”, u shpreh Ahmetaj.
Duke folur për krizën e shkaktuar nga invazioni rus në Ukrainë, Ahmetaj tha se, qeveria bëri një paketë injektuese për qytetarët në nevojë dhe për pensionistët. Ndryshon filozofia, jo nuk ndryshon filozofia. Më tej vendosi të mbante çmimet e energjisë si asgjëkundi tjetër. Të pandryshuara për familjet dhe për biznesin e vogël. Gjejeni një rast tjetër si ky”.
“U fut tek transporti publik 100 lekë për litër, në mënyrë që qytetarët sigurisht të ndryshojnë sjelljen e tyre konsumatore dhe të kalojnë nga konsumi i naftës tek transporti publik i subvencionuar”, u shpreh Ahmetaj.
“E njëjta gjë ndodhi me fermerët. Dhe shumë shpejt do të shtojmë dhe një 500 milionësh për naftën për fermerët. Patjetër”, nënvizoi Ahmetaj.
