“Buxheti 2022 është më i madhi në historinë e Shqipërisë që fokusohet te qytetarët dhe investimet në infrastrukturën gjigante, duke nisur nga tuneli i Llogarasë, Unaza e Tiranës, HEC-i i Skavicës, porti i ri i Durrësit e shumë projekte të tjera”.
Kështu u shpreh sot në një komunikim me mediet, zv/kryeministri Arben Ahmetaj, njëkohësisht ministër Shteti për Rindërtimin.
I pyetur mbi borxhet e akumuluara nga kompanitë e ujësjellës-kanalizimeve, Ahmetaj theksoi se “nuk ka borxhe të papaguara, por janë punë në proces të cilat paguhen në raport me dorëzimin e faturave dhe pagesën e faturave nga privatët të TVSH-së”.
Në të njëjtën kohë, Ahmetaj siguroi se me buxhetin e këtij viti, me Aktin e ri Normativ që do të bëhet në fund të vitit, do të ketë gjithashtu pagesa shumë të mëdha për të gjithë projektet e infrastrukturës, si atë rrugore, si atë të ujit.
“Avancimi i punëve do të jetë i përputhur i gjithi me pagesat për detyrimet që kemi ndaj kontraktorëve. E njëjta gjë ndodh edhe vitin tjetër dhe besoj shumë shpejt kryeministri do të paraqesë edhe reformën e ujit, një nga refomat më të mëdha në mandatin e tretë”, tha Ahmetaj.
Ai theksoi se “buxheti 2022 është më i madhi në historinë e Shqipërisë, në funksion të dixhitalizimit, shërbimeve ndaj qytetarëve dhe infrastrukturës gjigante”.
“Bëhet fjalë për investime si tuneli i Llogarasë, Unaza e Tiranës, HEC-i i Skavicës, hekurudha e Durrësit e shumë projekte të tjera. Pa absolutisht asnjë dyshim jemi para buxhetit më të madh në historinë e Shqipërisë që fokusohet te qytetari, shërbimet, infrastruktura në funksion të qytetarëve, sipërmarrja dhe zhvillimi ekonomik i vendit, si dhe i rritjes së konkurueshmërisë”, tha Ahmetaj.
