Agjentët imobiliarë dhe shoqëritë e ndërtimit presin rritje të çmimeve të pasurive të paluajtshme gjatë këtij viti dhe periudhës në vazhdim. Të pyetur për vrojtimin e realizuar nga Banka e Shqipërisë për tregun e pasurive të paluajtshme në 6-mujorin e dytë të 2024, shumica e ekspertëve janë të mendimit që çmimet do të jenë të qëndrueshme ose do të rriten.
Agjentët kanë dhënë përgjigje optimiste për gjendjen e përgjithshme në tregun e pasurive të paluajtshme në të gjithë territorin e vendit për horizontin afatshkurtër (gjashtëmujori në vazhdim) dhe janë gjithashtu optimistë për afatin e gjatë (gjatë dy viteve të ardhshme), thekson BSH. Përgjithësisht që nga viti 2015, prirjet e agjentëve kanë qënë për rritje çmimesh.
Pritshmëritë e ekspertëve për rritje çmimesh janë më të theksuara për pronat në bregdet e më pas për ato në Tiranë.
Nëse për rritjen e mëtejshme të çmimeve, ekspertët janë të ndarë mes atyre që parashikojnë rritje dhe atyre që janë për “çmime të qëndrueshme”, në lidhje me qiratë, sidomos të ambjenteve tregtare vërehet rritje çmimesh, që parashikohet të vazhdojë.
Agjentët raportojnë rritje të kërkesës për qiramarrje, si për banesa, ashtu edhe për prona tregtare dhe çmimet e qirasë kanë shënuar rritje. Aktiviteti i dhënies dhe marrjes së pronave me qira është i përqendruar në rajonin e kryeqytetit dhe veçanërisht në zonën e qendrës, thekson në vrojtim Banka e Shqipërisë. /ekofin.al
