Autoriteti i Konkurrencës vendos nën hetim paraprak Spitalin Amerikan, si edhe shoqërinë International Hospital Sh.a., e cila është përthithur po nga spitali amerikan. Vendimi është marrë nga Komisioni i Konkurencës në mbledhjen e datës 9 prill, pasi u shqyrtua raporti i monitorimit në tregun e shërbimit spitalor. Spitali Amerikan është në pronësi të biznesmenit Klodian Allajbeu.
Konkurrenca bën me dije se gjatë procedurës së monitorimit të tregut spitalor, është konstatuar pozita dominuese e ndërmarrjeve American Hospital SHA dhe International Hospital SHA (shoqëri e bashkuar me përthithje nga American Hospital SHA), në kuptim të nenit 8 të Ligjit nr. 9121/2003.
Neni 8 i ligjit për “Mbrojtjen e Konkurrencës” thekson se “Pozita dominuese e një ose më shumë ndërmarrjeve vlerësohet, duke marrë parasysh, veçanërisht: a) pjesën e tregut përkatës të ndërmarrjes ose ndërmarrjeve në shqyrtim dhe të konkurrentëve të tjerë; b) pengesat në hyrje në tregun përkatës; c) konkurrencën potenciale; ç) fuqinë ekonomike dhe financiare të ndërmarrjeve; d) varësinë ekonomike të furnizuesve dhe blerësve; dh) fuqinë kundërvepruese të blerësve; e) zhvillimin e rrjetit të shpërndarjes së ndërmarrjeve dhe mundësitë e shfrytëzimit të burimeve të produkteve; ë) lidhjet ekonomike me ndërmarrjet e tjera; f) karakteristika të tjera të tregut përkatës si: homogjenitetin e produkteve, transparencën e tregut, uniformitetin e kostos dhe të madhësisë së ndërmarrjeve, qëndrueshmërinë e kërkesës ose të kapaciteteve të lira prodhuese.
Gjithashtu, Konkurrenca thekson se nga të dhëna paraprake, është konstatuar se në lidhje me disa shërbime të caktuara dhe ekskluzive këto ndërmarrje mund të jenë objekt vlerësimi sipas nenit 9 të Ligjit nr. 9121/2003, i cili ka të bëjë me abuzimin me pozitën dominuese, duke vendosur ndër të tjera edhe çmime të padrejta të blerjes apo shitjes. Komisioni i Konkurrencës ka vendosur hapjen e procedurës së hetimit paraprak ndaj ndërmarrjeve American Hospital SHA dhe International Hospital SHA në tregun e shërbimit spitalor. Hetimi paraprak do të përfshijë periudhën kohore nga 1 janar 2022 deri në 31 dhjetor 2024, bën me dije Konkurrenca. Kjo nuk është hera e parë që tregu spitalor hetohet nga Konkurrenca. /ekofin.al
