Ministrja e Financave dhe Ekonomisë, Delina Ibrahimaj deklaroi sot se ekonomia shqiptare u rrit me 2.72 % për tremujorin e parë të vitit 2023, e udhëhequr nga turizmi, ndërtimi dhe eksportet.
Në konferencën e përmuajshme për mediet mbi treguesit ekonomikë, ministrja Ibrahimaj bëri të ditur se rritja ekonomike ishte në mesataren e vendeve të rajonit, por mbi mesataren e vendeve të BE-së.
“Rritja prej 2.72 % e ekonomisë ishte në mesataren e vendeve të rajonit, më e lartë se rritja në Serbi dhe Maqedoninë e Veriut, por më e ulët se në Kosovë dhe Malin e Zi. Në krahasim me vendet e BE-së, rritja ishte ndjeshëm më e lartë, pasi mesatarja e rritjes së ekonomisë në vendet e BE-së ishte 1 %”, u shpreh ministrja.
Ministrja theksoi se rritja ekonomike ishte e shpërndarë në të gjithë sektorët e ekonomisë.
“Ne kemi pasur një rritje me bazë të gjerë. Bujqësia, dhe peshkimi rezultoi me rritje 0.04 % të ndikuar pozitivisht nga aktiviteti i bujqësisë dhe blegtorisë, dhe më pozitivisht nga aktiviteti i peshkimit, i cili u rrit me 11 %. Eksportet bujqësore kanë rezultuar me një rritje të ndjeshme në vlerë dhe vëllim. Për tremujorin e parë eksportet bujqësore në vëllim shënuan rritje me 7.6 %, ndërsa në vlerë 16.8 %. Performanca pozitive e bujqësisë ka vijuar edhe përgjatë periudhës janar-maj, ku eksportet janë rritur me 15 % në vlerë dhe 14 % në vëllim”, theksoi ministrja.
Nga ana tjetër, ministrja tha se dega e industrisë ka kontribuar me 1.23 %, ku kontributin kryesor e ka dhënë dega e energjisë elektrike me një rritje rreth 6 pikë përqindje, ose 38.6 %, e ndikuar nga kushtet e favorshme hidrike që kanë ndikuar prodhimin vendas
“Industria nxjerrëse ka dhënë kontribut negativ dhe ecuria e industrisë është ndikuar nga ecuria e çmimeve në lëndët e para të produkteve të kësaj industrie”, vijoi më tej Ibrahimaj.
Ministrja vuri në dukje se edhe sektori i ndërtimit ka vijuar kontributin pozitiv në ekonomi, me rreth 4.5 %.
“Ecuria pozitive e këtij sektori pritet të vijojë edhe në periudhën në vazhdim, nisur qoftë nga numri, qoftë nga vlera e lejeve të ndërtimit, por edhe nga investimet private dhe ato publike”, deklaroi ministrja.
Tjetër sektor me ecuri pozitive, sipas Ibrahimajt, ishte ai i turizmit.
