Dhoma Amerikane e Tregtisë shprehu sot rezerva lidhur me projektligjin e ri “Për tatimin mbi të ardhurat”. Presidenti, Enio Jaço, tha se drafti paraqet problematika dhe nuk përmbush disa prej kritereve themelore.
Sipas tij, ky projektligj nuk është në harmoni me formalizimin e ekonomisë, nuk përmbush elementin e konkurrueshmërisë dhe të standardeve ndërkombëtare të kontabilitetit. Dhoma Amerikane sugjeroi zgjatjen e kohës së konsultimit publik për draftin.
Në lidhje me projektligjin tjetër, për amnistinë fiskale, Jaço tha se Dhomës Amerikane i duhet më shumë kohë për të shprehur një qëndrim përfundimtar.
“Nga analiza paraprake që i është bërë nga Këshill Teknik drafti ka ndryshime nga i mëparshmi, por jo esenciale. Problemi ynë dhe i partnerëve ndërkombëtarë është evazioni dhe pastrimi i parave. Nëse drafti i ndryshuar ka marrë mbështjen e FMN dhe Moneyval, ne do e mbështesim atë,” tha Jaço.
Ai theksoi se Indeksi i Klimës së Biznesit ka 4 vjet që po shënon rënie. Sipas tij, deri tani procesi i adresimit teknik të rekomandimeve të Dhomës Amerikane në lidhje me klimën e biznesit ka qënë i ngadaltë.
“Klimën e biznesit e ka Shqipëria në dorë. Për këtë arsye, kemi bërë axhendën e investimeve. Arritja e 75% të rekomandimeve, do të jepnte një klimë të kënaqshme, ndërsa deri tani janë implementuar 33% e rekomandimeve. Duhet të ketë procedura më të thjeshtuara për investimet, si në rastin e lejeve të ndërtimit. Duhet inciatiava të qarta për investimit. Duhet të ketë rënie të monopolove në disa sektorë. Propozojmë miratimin e paketës ligjore anti korrupsion në Parlament dhe të Paketës “antirryshfet”, sipas përcaktimeve të OSBE. Për standardet e prokurimeve, duhet të jemi konservatorë, që të ketë sa më pak raste përjashtimore. Duhet të përfshihet shoqëria civile për të monitoruar situatën me prokurimet. Roli i medias në këtë drejtim është i rëndësishëm. Falenderoj mediat si BIRN, Monitor, Faktoje për rolin e tyre. Problem tjetër është konsultimi publik i ligjeve dhe ndryshimet e shpeshta në legjislacionin tatimor. Nëse ligjet ndryshojnë çdo vit, bizneset e kanë të pamundur të bëjnë parashikimi. barra tatimore nuk duhet tëo jetë më e lartë se Ballkani Perëndimor,” tha ai.
Dhoma Amerikane e Tregtisë njoftoi se në vjeshtë do të organizojë një konferencë rajonale biznesi, në bashkëpunim me Departamentin e Shtetit. Jaço tha se në konferencën Smart City do të jenë të të pranishme kompani si Google, Amazon, Tesla, etj.
