Kreditimi në euro është në rritje të ndjeshme gjatë këtij viti.
Banka e Shqipërisë, bën të ditur se, sektori bankar ka dhënë 715 milionë euro kredi të reja, në 10-mujorin e parë të këtij viti, duke shënuar rritje me 35% krahasuar me të njëjtën periudhë të një viti më parë.
Sipas BSH-së, 47% e kredisë së dhënë këtë vit, ka një maturitet afatgjatë, me më shumë se 5 vjet, çka tregon se rritja e kredisë në euro po nxitet nga kreditimi për financimin e investimeve si nga individët, ashtu edhe bizneset.
Gjithashtu një arsye tjetër e rritjes së kredisë në euro, janë edhe normat e interesit më të ulëta krahasuar me kredinë në lekë.
Banka e Shqipërisë bën të ditur se, kreditë në valutë përbëjnë 49.9% të portofolit total të kredisë.
