Pasuria mesatare e të rriturve për person në Evropën Perëndimore është më pak se gjysma e nivelit të Shteteve të Bashkuara. Vendet evropiane paraqiten më mirë kur krahasimi bëhet sipas pasurisë mediane, ndërsa SHBA-ja humbet ndjeshëm pozicione.
Pasuria për frymë ndryshon ndjeshëm në vende të ndryshme të botës, sipas të dhënave të Raportit Global të Pasurisë 2026 të UBS-së.
Shtetet e Bashkuara zotërojnë 38.1% të pasurisë personale të përfshirë në 56 vendet e raportit, të cilat përfaqësojnë mbi 92% të pasurisë botërore.
Evropa Perëndimore renditet e dyta me 21.9%, ndërsa Evropa Lindore përfaqëson vetëm 3.3%.
Edhe pasuria mesatare dhe ajo mediane për të rritur ndryshojnë ndjeshëm nga një vend në tjetrin. Nga 30 ekonomitë me pasurinë mesatare më të lartë për të rritur, 18 ndodhen në Europë. Numri rritet në 19 vende kur krahasimi bëhet sipas pasurisë mediane.
Por cilat janë vendet më të pasura për nga pasuria për të rritur dhe sa pasuri zotërojnë europianët?
Në fund të vitit 2025, Zvicra kryesonte listën globale të 30 vendeve me pasurinë më të lartë mesatare, me 777,506 euro për të rritur. Shtetet e Bashkuara renditeshin të dytat me 594,651 euro, ose 696,277 dollarë. Luksemburgu ishte vendi i Bashkimit Europian me pasurinë mesatare më të lartë për të rritur, në 559,170 euro.
Hong-Kongu, Australia dhe Singapori vijonin renditjen, të gjitha me mbi 450 mijë euro.
Danimarka, me 446,959 euro, Norvegjia me 363,303 euro dhe Holanda me 354,673 euro ishin vendet e tjera europiane në dhjetëshen e parë.
Pasuria mesatare për të rritur kalonte nivelin e 300 mijë eurove edhe në Belgjikë, me 348,382 euro, dhe në Suedi, me 347,089 euro.
Gjermania renditet më lart, në vendin e 14-të, ndërsa Italia është më poshtë, në vendin e 23-të. Megjithatë, diferencat në nivelin mesatar të pasurisë nuk janë shumë të mëdha.
Pasuria mesatare për të rritur në Gjermani arrin në 296,023 euro, kundrejt 238,653 eurove në Itali. Franca vijon me 291,536 euro, Spanja me 261,689 euro dhe Mbretëria e Bashkuar me 250,071 euro.
Irlanda, me 268,312 euro, Austria me 239,123 euro, Finlanda me 178,610 euro, Portugalia me 167,188 euro, Malta me 139,769 euro dhe Greqia me 122,421 euro janë vendet e tjera europiane që përfshihen në 30-shen e parë.
Pasuria mediane paraqet një tablo tjetër
Kur pasuria për të rritur matet me medianën dhe jo me mesataren, si shumat ashtu edhe renditja ndryshojnë ndjeshëm. Mediana është vlera që ndodhet në mes të një serie të renditur nga më e ulëta te më e larta ose anasjelltas.
“Përfundimi që mund të nxjerrim është se çdo treg ka një shpërndarje të ndryshme të pasurisë dhe, për këtë arsye, mund të duket më i pasur ose më i varfër, në varësi të segmentit të popullsisë së rritur që analizojmë”, thuhet në raport.
Luksemburgu kryeson renditjen globale për pasurinë mediane, me 336,498 euro. Kjo shumë është më pak se gjysma e nivelit më të lartë të pasurisë mesatare. Belgjika renditet e dyta, me pasuri mediane prej 236,712 eurosh.
Australia, me 180,018 euro, Zelanda e Re me 176,460 euro dhe Hong-Kongu me 160,533 euro janë gjithashtu në dhjetëshen e parë, ashtu si në renditjen sipas pasurisë mesatare.
Danimarka, me 174,029 euro, Zvicra me 124,310 euro dhe Norvegjia me 119,569 euro janë vendet e tjera europiane në dhjetëshen e parë.
Përmbysje e renditjes mes pesë ekonomive më të mëdha europiane
Renditja ndryshon tërësisht mes pesë ekonomive më të mëdha të Europës. Italia ka pasurinë mediane më të lartë për të rritur, me 111,881 euro, duke u renditur e 11-ta në botë. Gjermania, përkundrazi, ka vlerën më të ulët, me 45,679 euro, duke zënë vendin e fundit në listën e 30 vendeve.
Mbretëria e Bashkuar, me 107,042 euro, Franca me 104,106 euro dhe Spanja me 95,290 euro janë më pranë nivelit të Italisë, duke e bërë shifrën e Gjermanisë dukshëm më të ulët.
Kur krahasohen të dyja listat, Sllovenia zë vendin e Emirateve të Bashkuara Arabe në renditjen sipas pasurisë mediane.
Përqendrim i lartë i pasurisë ekstreme
Shtetet e Bashkuara renditen të tretat nga fundi sipas pasurisë mediane, me 58,927 euro, ndërsa janë të dytat në renditjen sipas pasurisë mesatare. Ky është ndryshimi më i madh i pozicionit në të gjithë listën.
Edhe Gjermania humbet 16 vende, duke kaluar nga pozicioni i 14-të në të 30-in. Rënie me më shumë se 10 vende regjistrojnë gjithashtu Suedia dhe Singapori.
Këto vende renditen dukshëm më lart sipas pasurisë mesatare sesa sipas medianës, çka tregon një përqendrim të madh të pasurisë ekstreme në shtresat më të pasura.
Japonia ngjitet me 14 vende, nga pozicioni i 24-t në të 10-in. Malta, Italia, Belgjika dhe Mbretëria e Bashkuar janë vende të tjera që përmirësojnë ndjeshëm renditjen kur përdoret pasuria mediane. Kjo tregon një shtresë të mesme më të gjerë dhe një shpërndarje më të barabartë të pasurisë.
Raporti thekson se pasuria mediane jep një panoramë më të saktë të niveleve të pasurisë që mbizotërojnë në pjesën e mesme të popullsisë.
Megjithatë, këto të dhëna nuk tregojnë asgjë për fuqinë blerëse.
Në nivel rajonal, Shtetet e Bashkuara kanë qartësisht pasurinë mesatare më të lartë për të rritur krahasuar me rajonet e tjera, përfshirë Europën.
Në SHBA, pasuria mesatare arrin në 594,651 euro për të rritur. Në Europën Perëndimore ajo është më pak se gjysma e këtij niveli, në 287,884 euro, ndërsa në Europën Lindore bie në vetëm 53,055 euro./Përshtati nga Euronews, ekofin.al
