Shoqëritë e ujësjellës-kanalizimeve që operojnë në zonat me fluks të lartë turistik mund të aplikojnë në të ardhmen tarifa me blloqe për furnizimin me ujë, me synimin për të frenuar konsumin mbi normë dhe për të menaxhuar më mirë burimet ujore gjatë sezonit veror.
Propozimi u bë publik nga kryetarja e Entit Rregullator të Ujit (ERRU), Gerta Lubonja, gjatë prezantimit në Kuvend të zbatimit të rekomandimeve të Rezolutës për vitin 2025 dhe të komenteve të institucionit mbi projekt-rezolutën e vitit 2026.
Në komentet që ERRU i propozon Kuvendit për riformulimin e rekomandimeve, institucioni sugjeron që fokusi të mos jetë vetëm te instalimi i ujëmatësve, por edhe te përdorimi i një modeli të ri tarifimi në zonat ku kërkesa për ujë rritet ndjeshëm për shkak të turizmit.
“Referuar problematikave që përballen shoqëritë UK që ofrojnë shërbimet në zona me fluks të lartë turistik, ERRU të inkurajojë veçanërisht këto shoqëri për aplikimin e tarifave me blloqe për të bërë të mundur uljen e konsumit mbi normë të ujit nga konsumatorët, veçanërisht në zonat turistike dhe për konsumatorët jo familjarë.”
Çfarë janë tarifat me blloqe?
Tarifimi me blloqe është një model i përdorur në shumë vende, ku çmimi i ujit ndryshon në varësi të sasisë së konsumuar. Konsumi bazë mund të tarifohet me një çmim më të ulët, ndërsa për sasitë që tejkalojnë një prag të caktuar aplikohet një tarifë më e lartë.
Në praktikë, ky mekanizëm synon të nxisë kursimin e ujit dhe të dekurajojë konsumin e tepërt, veçanërisht në periudhat kur rrjetet e furnizimit përballen me ngarkesë të lartë.
Fokus te zonat turistike dhe bizneset
Propozimi i ERRU-së lidhet drejtpërdrejt me zonat turistike, ku gjatë sezonit veror konsumi i ujit rritet ndjeshëm për shkak të numrit të lartë të vizitorëve.
Nëse rekomandimi përfshihet në rezolutën e Kuvendit dhe më pas zbatohet nga shoqëritë rajonale të ujësjellës-kanalizimeve, tarifimi me blloqe do të synojë kryesisht konsumatorët jofamiljarë, si hotelet, resortet, restorantet dhe subjektet e tjera të turizmit që kanë konsum të lartë uji.
Qëllimi është të reduktohet konsumi mbi normë dhe të garantohet një përdorim më efikas i burimeve ujore në zonat ku infrastruktura vihet nën presion gjatë muajve të verës.
Ende nuk është vendim për tarifa të reja
Propozimi i paraqitur nga ERRU nuk përbën një vendim për rritje ose ndryshim të menjëhershëm të çmimit të ujit.
Ai është pjesë e komenteve që institucioni i ka paraqitur Kuvendit për projekt-rezolutën e vitit 2026 dhe synon të orientojë politikat rregullatore drejt një menaxhimi më efikas të konsumit në zonat turistike.
Zbatimi i një skeme të tillë do të kërkonte më tej vendimmarrje nga institucionet përgjegjëse dhe aplikim nga shoqëritë rajonale të ujësjellës-kanalizimeve, sipas kuadrit rregullator në fuqi.
Në një kohë kur turizmi në Shqipëri po regjistron rritje të vazhdueshme dhe presioni mbi infrastrukturën e ujit po shtohet, propozimi i ERRU-së sinjalizon një qasje të re: përdorimin e politikave tarifore jo vetëm për mbulimin e kostove të shërbimit, por edhe si instrument për menaxhimin e qëndrueshëm të konsumit të ujit./ekofin.al
